唔一定每個老前輩都係Old Seafood，我就曾經遇過一位同事叫Danny，佢從來唔吝嗇同後輩分享經驗。
Danny其實係隔籬team嘅阿頭，冇機會直接under佢只可以話我唔夠福氣。初初入嚟做嗰陣，我仲係一個客客氣氣嘅新人，每個同事走嚟要我幫忙，我都一定會答應，阿爸阿媽教落，唔好怕蝕底吖嘛。
慢慢地我發現原來冇人感恩，亦冇人會對返我好，相反地，我嘅回報係更多嘢做，更多不合理同埋唔公平嘅待遇。
Danny見我成日畀人老點，又忙到lunch都出唔到去食，有次佢走埋嚟同我講，如果咩都say yes，咩都唯命是從，周圍嘅人自自然然會蝦我，就算唔蝦我亦唔會出手幫我，所以善良同埋好脾氣冇問題，關鍵係要守住條底線，要識得回絕或者還擊，咁先可以保護自己嘅權益。
我條team同佢條team嘅氣氛有好大差別，Danny成班人好似兄弟姊妹，我嗰邊就好多怨氣，最初返工仲有自己team嘅同事問我點解入嚟做，係咁講公司呢樣唔好，嗰樣唔好，你知新人冇乜經驗好容易動搖，搞到我頭一個月已經好想辭職。
可能見到我愁眉苦臉，Danny有次喺pantry同我傾計，佢聽完之後就話，一份工好唔好做，唔應該單純聽人哋評價，喺一間公司裡面，有人日日數手指等收工，有人就要晚晚OT，好多嘢都係取決於心態同埋處事方法，要自己經歷同埋感受。
嗰幾年我冇諗太多，只求做好本份，後來終於叫做升咗職，雖然我好努力工作，但從來唔會叫班下屬無意義OT，因為Danny講過，公司係老闆嘅，身體先係自己嘅，捱壞咗要用自己嘅錢嚟醫，唔應該為人哋嘅事業出賣自己健康，工作問心無愧就得喇，唔需要下下用OT嚟取悅老細。
Danny除咗係我前輩，亦係我嘅良師益友，佢4年前喺睡夢中離世，心臟病，59歲就走咗。Danny太太話佢走得好安詳，但當時真係太突然，公司好多人都接受唔到，好多同事都唔捨得亦唔相信，其實Danny出事前幾日仲同我哋有講有笑，原來人真係好化學。
我哋全部人後來都有去殯儀館送別Danny，我記得當日要返工，大家放工後一齊出發。
Danny生前同我有好多交流，我仲成日msg佢問意見，而佢從來唔會擺出一副Old Seafood嘅架子，永遠都係咁nice，好肯教導後輩，直至而家為止，我都會成日翻睇同Danny嘅對話，有好多我都cap低咗。
對我嚟講，Danny絕對係一個可遇不可求嘅前輩，我知道唔會再遇到下一個，但希望我自己喺後輩心目中係另一個Danny，我一直以佢為榜樣。
投稿讀者：Ernest