幾年前，有位任職雜誌編輯嘅friend想買部單反相機送畀女友，咁啱佢喺工作上認識呢個相機品牌嘅PR，所以就口痕R discount。
對方真係畀咗個discount code佢買，結果慳咗980蚊，然後佢請個PR食飯，又唔好意思去茶記，最後嗰餐食咗700幾蚊。
980－700=慳得280蚊？可能有人會話，數唔係咁計，識多個朋友唔係用呢少少錢去衡量，不過故事嘅發展係個PR之後成日提住，經常丟啲新聞稿過去叫佢喺雜誌登，當然係免費嗰種啦，有時雜誌版位full晒，PR就會重提：「唔係咁都唔幫呀？上次你要買單反，我都幫你拎咗discount啦！」
有時個PR仲會叫佢出席活動，幫手去現場影幾幅相再登出街，撞正要採訪其他嘢冇時間去，個PR又會同佢講：「唔係咁都唔幫呀？上次你要買單反，我都幫你拎咗discount啦！咁啦！你唔得閒啫，叫公司其他同事嚟囉，影幾張相好快啫，個event如果唔夠記者，我好難同客交代㗎！」
其實呢幾年裡面，個編輯已經請咗個PR食幾餐飯，出過好多段新聞稿，去過好多次event，980蚊嘅discount，應該還返凸冇10倍都至少7至8倍。最搞笑係編輯當年咪送部單反畀女友嘅，個女朋友都分埋手㗎喇，PR都仲提緊呢筆人情債。
最近有另一個friend又想買部單反加埋鏡頭自用，佢問我同埋個編輯係咪識人，個編輯同佢講：「慳得一千幾百，不如你自己落街舖買啦，又可以即刻到手，又唔使欠人情，肺腑之言，唔係唔想幫你問。」
類似嘅情況我都試過，後來學識咗一個道理，除非係推心置腹嘅好友，否則可以用錢解決嘅問題，唔好用人情，因為錢只係一個數值，而人情係無限值。
唔止講緊買嘢R discount，適用於任何範疇。