傳說中嘅憑實力單身─情侶座

疫情之前,亦即係今年年頭左右,我以為撮合咗一對會員,當時見佢哋郎情妾意,男嘅做IT,女嘅做婚禮佈置,聽聞已經出過幾次街,所以我就冇特別跟進喇。

點知近日我收到呢位女會員嘅enquiry,問我哋係咪停晒活動,有冇搞啲視像speed dating之類,咁我就梗係奇怪啦:「你同IT男分咗手嗱?」

原來佢哋根本冇開始過。

個女仔同我講,有次IT男接佢放工,咁啱佢幫一對新人做緊婚宴場地backdrop同埋一啲decoration,總之有一大袋嘢要拎返屋企趕工,對女仔嚟講,嗰袋嘢都幾重下,IT男見到就話:「你拎得好辛苦咁喎,有冇咁重呀?拎嚟試下。」

個女仔甜絲絲遞過去之後,IT男拎起手講咗句:「嘩!真係好重喎!」跟住就遞返畀個女仔自己拎。

其實IT男又唔係老奉要幫手拎嘅,所以個女仔第二日諗返就冇再擺喺心喇。再隔多幾日之後就到個女仔生日,IT男話有份禮物送畀佢,問可唔可以出嚟食飯?可惜個女仔要同屋企人食,唯有另擇吉日,IT男喺電話度講:「唔緊要吖,我搵Lalamove畀咗份禮物你先,禮物正日送好啲,我哋下星期再食飯啦!」

同日下午,個女仔收到IT男送嚟份禮物,滿心歡喜打開之後,原來係兩個 紫~色~啞~鈴!

大概過咗10分鐘,IT男send message畀個女仔:「鍾唔鍾意呀?特登揀紫色㗎!上次見你拎住袋重嘢好似好唔開心咁,其實你唔使唔開心㗎,可能係平時掛住做嘢少運動啫,希望你得閒舉下,每次舉起都會記得我,祝你身體健康!Happy Birthday!下星期再同你食飯。」

然後,呢個故事就冇後續喇。

error: