頭先落樓下買外賣，事頭婆同我探熱嗰陣，我見到地下有張100蚊紙，有位食客一個箭步衝前踩住，蛇頭鼠眼咁左望右望，再烏低身綁鞋帶（我見佢冇甩鞋帶純粹扮綁），然後佢嘅眼神變得好兇狠同埋堅定咁再一次左望右望，喺鞋底好細動作咁拎起張100蚊紙，回頭向佢老公報以一個燦爛嘅笑容，佢老公因為唔知咩事而面露黑人問號。
事頭婆問我：「今晚想食乜呀？」我都未答得切，執咗100蚊紙個食客已經「神行步」咁攝埋我個位，好緊張咁講：「埋咗我張單先！埋咗我張單先！」
事頭婆：「唔使咁緊張，100蚊紙係你自己跌㗎，頭先本來想探埋熱同你講，見你已經踩住咗。」
食客一秒鐘收返起頭先個燦爛笑容。