小小嘅分享，好多人都話老一輩唔肯接受新嘢，其實我想講，有啲嘢同年齡無關，而係睇你肯唔肯接受新事物，定係甘心故步自封。
我哋成班女仔20幾歲，日日傾Mirror Error Mirror Error，Lunch又要舊片重溫，接待處個姐姐Linda其實頂我哋唔順，唔好以為receptionist 一定係後生女，佢50歲㗎喇，個仔都10幾歲。
因為我哋公司好多外人會上嚟，receptionist每日要對咁多人，唔多唔少梗會遇到啲奇奇怪怪或者冇禮貌㗎啦，所以Linda係受埋唔少氣，有個朝頭早佢行開咗去廁所，咁啱速遞到，結果佢返嚟之後係咁畀個速遞員鬧，話佢阻住個地球轉，阻住佢派另一間，仲要係用粗口問候喎，我都唔明點解而家啲人可以咁惡，互相尊重啦，你要怨都有好多方法㗎啫，唔使下下搬人老母出嚟嘅。
嗰日Linda當然唔開心啦，直情畀人用粗口鬧到喊， 所以lunch就破天荒拎住個飯盒去我哋度訢苦，當時成班同事翻睇緊《花姐Error遊》食辣麵嗰集，Linda最初喺隔籬一邊睇一邊challenge㗎，又話嗰條友講嘢好寸（佢指保錡），又話肥仔成日畀人窒，佢仲話阿Dee似梁思浩（阿Dee fans唔好嬲，Linda當時都唔知邊個係阿Dee），不過當Linda睇到Error四個人食辣麵食到爆粗、食到喊、食到嘔，最後仲搞到要call白車入醫院之後，佢就即刻破涕為笑，Linda朝早先喊完，嗰日佢第一次笑。
然後我哋再睇多集「蟑螂養殖場」，Linda由頭到尾睇到依嘩鬼叫，193畀人兜頭淋曱甴嗰陣，Linda直頭掹住我件衫又笑又叫，我心諗你做乜鬼呀😂😂😂
從此以後，Linda就日日同我哋傾，日日同我哋一齊睇，其實佢之前返工好冇朝氣，都正常嘅，年紀大冇咩寄託，份工又要畀人鬧，阿仔10幾歲反叛期又唔係好聽話，畀我都hea做啦，唔係話佢睇咗Error之後唔同晒，但就真係多咗笑容。
其實鍾意Mirror又好，Error又好，我哋從來冇迫過其他人要一齊鍾意，好似呢位50歲同事咁樣，佢可以從中獲得快樂同寄託，已經夠晒啦！
我哋冇特別走去「導」Linda㗎，佢自己返去睇返去研究，初初都好好笑，有兩個Anson又分唔到，但早排見佢post咗張Mirror演唱會嘅相，成班同事即刻問咗句：「你點影㗎？」
Linda：「我……買咗黃牛，唔敢同你哋講。」
「幾錢呀？自己去睇？」
Linda：「係呀，自己睇，幾錢就唔好講喇。」
「講啦，幾錢呀？」
Linda：「唔記得喇。」
呢條女癲㗎，竟然仲癲過我哋，我都唔捨得買黃牛。
Linda仲話，佢後生嗰陣最紅係四大天王，識得個friend勁迷黎明，無論Leon開幾多場演唱會，嗰個friend都會買晒咁多場嘅飛，而家只係時代唔同，但無論迷邊個都好，呢啲都係個人喜好，自己搵到開心嘅方程式就已經足夠，唔會去踩其他人嘅偶像，純粹默默支持自己喜歡嘅人同埋事啫。
咁佢又講得幾啱嘅，記得你之前喺IG都出過一個post～～～只要能從中得到樂趣，就唔算係浪費。
投稿讀者：Sandy