「你姓周？係Chow定係Chau？咁英文名Carmen有冇落埋身份證㗎？」不斷追問我個名嘅人叫Kate，當時啱啱入咗呢間公司兩日，不知就裡所以照直答佢，點知隔咗唔夠半個鐘，Kate遞咗封信畀我：「嗱！幫你打埋喇，聽日交啦！同我一齊last day，呢度真係唔好做㗎！」
無端端幫我打埋辭職信，你話嚇唔嚇死？我同佢講冇考慮辭職，然後呢位Kate小姐即刻加大力度：「留低做咩吖，冇前途㗎！個阿頭會撳住你，永遠冇得上，福利又差，我啲friend閒閒地都18日大假，呢度得13日咋，仲有呀，呢間公司啲同事個個好自私，一齊走啦，玩殘佢哋！」
公司請我返嚟就係代Kate嘅位，嗰陣佢仲有3日就last day，本來個manager係想佢帶住我，講清楚啲嘢點交接，但係Kate基本上冇乜點教我嘢，大部分時間都係同我講是非，除咗猛咁彈公司福利同埋制度之外，Kate亦幾乎講齊晒所有同事嘅壞話，IT部有位同事離過兩次婚、Admin有個女同事上年小產、Sales Team傳聞會開「床單」、老細疑似包養receptionist……我做得一兩日，聽到嘅故事可以開部20集長劇。
Kate又唔畀我同其他同事食飯，第一日manager話請我食welcome lunch，Kate竟然代我推卻，表示有好多嘢要用食lunch時間教我，點知去到lunch time，佢只係不斷講八卦嘢，但關乎工作嘅嘢一啲都冇講。
我返工第二日，Kate仲自把自為幫我打定辭職信，真係當我第一日出嚟社會做嘢咩！你講幾句就唔做？大家都係成年人啦！我唔返工係咪你出糧畀我呀？同埋你咁樣向個新人「落藥」，日踩夜踩間公司，又未停過唱衰同事，近乎強迫性咁要我陪佢同一日last day，我好似返咗工幾日啱啱先識你咋喎！傻嘅都聽得出係別有用心啦，唔通你會為我著想到呢個地步咩！
其實冇順應佢要求辭職之後，Kate最後一日對我態度都麻麻，仲講咗幾句好難聽嘅說話，其中一句係：「唉，我唔知你喇，你死你事，到時後悔唔好怨我。」講真我聽完有啲嬲，但我冇理由為咗個last day嘅人動真火，然後畀其他同事見到咁核突㗎嘛！
Kate走咗咋，但係成件事仲未完，因為交接工作嗰陣佢問我拎咗WhatsApp，所以佢離職後仍然msg我，問我考慮成點？幾時會辭職？條女癲㗎喎！唔知仲以為我答應咗佢共同進退！初時我都會禮貌回應佢兩句，後來我直接reply「忙緊」，又或者已讀不回，完全唔想睬佢。
但係已讀不回佢都唔放過我呀！Kate係喪到打我條直線（即係佢原本個枱頭電話）：「喂！我係Kate呀！做咩唔覆我呀？好忙咩？都話咗啦！我一走佢哋就會畀晒啲嘢你做，明恰你呢啲新人，辭職啦！幫你計過㗎喇，下個月你就過試用期，到時resign要一個月前通知，係走就快喇！」
後來我做耐咗，同其他人熟咗，結果我都係將呢件事講咗畀同事知，其實我初時都覺得奇怪㗎喇，Kate要走，你搵人交接點會咁「忟水」，得兩三日好難pick up晒啲嘢，原來我嚟之前已經有個女仔返過工，唔夠一個星期就話自己唔適合，好快resign唔做，如無意外係畀Kate打咗毒針，後來先臨急臨忙請咗我。
至於Kate點解要咁做，班同事就話係心理問題冇得解，因為Kate平時喺公司都係一個放負王，廁紙又彈，A4紙又彈，公司生意好嘅時候呻好忙，會發脾氣，生意唔好嗰陣又笑老細同班Sales冇用，同事著短裙就話人勾佬，著長裙又話人老土，總之出自佢口就全部都係負面嘢。
咁究竟IT部同事係咪離過兩次婚，而Admin女同事又係咪曾經小產？我冇興趣知，返工好簡單，準時出糧就夠㗎喇，冇需要去挖其他人嘅私隱，同樣地，我都唔想人哋八卦自己嘅私生活，話知老細包養receptionist又好，包養埋pantry lady都好，關我鬼事咩！
最重要係呢度嘅同事並唔係好似Kate所講咁自私，好簡單一個例子，Kate最後三日根本冇教我任何嘢，就連login個system都冇向我示範，結果咪又係勞煩其他同事由零開始去教我，佢哋好有耐性，知道Kate乜嘢都冇交低，明明唔係份內事都細心講解每個程序我知，邊個好心，邊個黑心，一眼已經睇得出啦！
每份工作對唔同嘅人嚟講，的確會有唔同嘅感受，可能Kate遭受過一啲苦係我睇唔到，或者未睇到，但係無論點都好，有啲嘢要靠自己去發掘，唔好聽one side story就去預判結果，信人不如信自己，我而家做得幾開心呀，而且過咗試用期都即時加咗人工，我覺得個加幅畀我想像中多，另外HR已經講咗，雖然我未做滿一年，但係嚟緊雙糧都會除返月份計畀我，算係咁啦！
不過今朝我仲收到Kate嘅電話，又係打直線嚟，呢下真係有啲煩，我已經次次都話忙唔想同佢講，但佢亦好唔識做隔幾日再打嚟，如果換轉係你，你又會點樣對應呢？始終直線電話冇得唔聽，係咪要狠狠地鬧佢一次？