「你做咩會同個女同事去旅行先？又唔係friend，又唔係拍拖，你肯定一開始立心不良想食免費餐啦！係咪搞完嘢唔認數呀？不過佢而家辭咗職咪仲好，冇手尾跟啦！」面對呢啲質疑，我除咗無話可說，都明白點解其他人會咁諗，但係立心不良嘅唔係我，係個女同事囉！
話說大半年前左右，成班同事傾計講開最想去邊度旅行，咁我就話自己一直plan緊去荷蘭，可惜身邊啲朋友個個淨係識去日本韓國泰國，冇friend想去歐洲，然後有個女同事Rosalind就搭嘴：「荷蘭正喎！我又係想去但冇伴呀！」呢一句揭開咗出事嘅序幕，緊接落嚟就係一段「奇妙旅程」。
利申我係男，所以就算有女同事話想一齊去旅行，咁唔通我真係同佢去咩？點知Rosalind好認真走去做research，隔咗個零禮拜就send咗個荷蘭+比利時嘅行程過嚟，咁都未算，Rosalind仲keep住問我幾次係咪結伴出遊……嗱！我真係完全冇邪念，因為Rosalind根本唔係我杯茶。
Rosalind話兩個人可以互補長短，除咗分擔下搵路搵景點嘅工作，仲可以試多啲唔同嘅餐廳同菜式，諗諗下又唔係冇道理嘅，例如有間比利時嘅餐廳叫Chez Leon，最出名係食海鮮，一個人嗌唔到幾多，但兩個人可以order多啲試多啲，嗰陣我就係基於呢個諗法而覺得結伴無妨。
一開始Rosalind叫我唔好同其他同事講，怕喺公司惹是非，我梗係贊成啦！結果我同佢前後腳請假，其實都有口痕友質疑點解會咁巧合，但由於我同Rosalind平時喺公司唔係熟到攬頭攬頸，更加冇曖曖昧昧（真係100％冇嘢），所以撞假都係畀人抽一兩句水，冇咩漣漪同後續。
無可否認，由plan行程到出發前一刻，我同Rosalind嘅交流同相處都好愉快，但係到達荷蘭嘅第一晚就出現問題喇，因為佢負責book酒店，間房竟然係雙人床……得得得，明白大家諗咩，唔使扮君子吖嘛！不過我冇咁諗呀！首先你唔好幻想Rosalind係靚靚女女先，佢仲大隻過我！
哦！嫌人哋大隻，又嫌人哋唔靚！你當係啦！正正因為咁，我先覺得大家可以用普通朋友身份做旅伴，我對Rosalind絕無非份之想㗎！
更恐怖嘅係，唔止第一晚，整個荷蘭+比利時嘅行程，Rosalind都係book晒「一張大床房」，其實佢book之前有send啲酒店link畀我睇，我唔係冇參與，但就冇諗過佢會全部選擇雙人床，唔通佢話負責book，我喺旁邊提佢記得book雙床房咩？呢啲唔使特登講㗎嘛，如果我出發前無啦啦斟酌呢樣嘢，成件事咪更加奇怪囉！
第一晚我哋同床已經好奇怪，佢仲要拖住我隻手瞓……
安全過咗第一晚，第二日起身嘅行程都仲係好愉快，但第二晚就出事喇，Rosalind沖沖下涼大嗌，咁都要理佢㗎！佢話個熱水壞咗，叫我入去幫佢搞，我都唔知佢沖到咩地步，再三確認係需要我幫手之後咪開門囉，嘩屌！Rosalind係一絲不掛咁企喺度，你披下毛巾都好吖！
我睇到呆咗呀！唔係覺得身材好正睇到流鼻血嗰種呆咗，我呆係因為唔明點解佢一啲避忌都冇，而且個熱水冇問題囉！兩三下手勢test咗有熱水我就出返去，呢一晚大家又同床，今次Rosalind唔止拖住我隻手喇，佢直頭成個人攬住我瞓，好似樹熊咁，大脾仲壓住我何B仔。
我記得自己係推開咗佢隻腳，唔係扮清高，都唔係有反應，而係佢責到我個何B仔好痛呀！
第二晚我就係咁樣畀Rosalind攬住瞓，好唔舒服，想郁下都有壓力。但係第三第四日行程其實還可以，大家plan好要去嘅地方同餐廳都順利去晒，直至第五日左右啦，我發覺Rosalind開始黑口黑面嬲爆爆。
我想講呢！有時兩個人熟，例如朋友，家人，或者情侶，有咩唔對路你可以問，甚至唔問都大致get到，不過我同Rosalind呢種普通同事朋友關係，我根本唔知佢黑口黑面嘅原因，期間我問過佢一兩次係咪有事唔開心，Rosalind又唔答，所以最後幾日嘅氣氛就變得好奇怪。
好不容易「捱」埋淨低嘅行程，我真係要用個「捱」字去形容。
返到香港機場，佢連bye bye都唔講，拎完行李就粒聲唔出走咗去，因為我件行李遲過佢出，所以想追都追唔到，出到離境大堂已經見唔到佢，當晚我即刻WhatsApp Rosalind，禮貌地問佢安全返到屋企未，屌那媽佢已讀不回囉！我究竟做錯咩呀？
第二日返到公司見到Rosalind，我就進一步得知佢打算同我決裂喇，因為Rosalind連招呼都唔同我打，早晨又唔講，佢對住個個同事都一如以往，但對住我就好似見到仇人咁，我有咩得罪你呀？
結果我忍唔住再WhatsApp佢，問下究竟咩事，會唔會係行程中我有嘢做得唔好，Rosalind終於回我喇，佢打咗句咁嘅msg：「你做咩唔搞我？」
我reply：「做咩唔搞你？😅」
用「😅」呢個emoji，係因為佢好代表到我嘅心情，傻笑，苦笑，又滴晒冷汗不知所措。
Rosalind：「我已經拖住你手，攬住你，你咁都唔搞我？你知唔知我幾尷尬呀？」
嘩！你尷尬定我尷尬呀？我答返佢冇諗過去旅行係要搞佢，因為我真心真意想大家結伴同遊，兩個人可以互相幫手plan行程，可以試多啲餐廳食多啲嘢，可以share酒店同埋其他成本，最初Rosalind自己都係咁講㗎喎！包搞嘢同一定要搞嘢㗎？
Rosalind喺公司對住我黑口黑面嘅日子維持咗三個月，後來終於結束喇，唔係佢原諒我呀，係佢無啦啦辭職，因為大家已經成三個月冇講嘢，我又唔覺得自己錯，如果佢係仔，我真係會屌柒佢，但佢係女，我又睇咗佢全相，佢又反質疑我點解唔搞佢，唔通我仲走去鬧人咩，咪唔出聲由得Rosalind嬲囉！
Rosalind向其他同事講，佢係搵到新工所以先至辭職，有個別一兩個同事就發覺Rosalind好似對我態度特別差，佢哋問過我係咪工作上有拗撬，我話自己都唔知咩事，唉！廢事講多錯多啦！一陣其他人以為我「趙完鬆」，Rosalind走咋，我仲繼續留喺度做㗎！
公司以外啲friend就質疑我點解會同個女同事去旅行，又唔係拍拖，仲一口咬定我由頭到尾立心不良想食免費，又話我搞完嘢唔認數，冤枉呀！就係啲friend一個二個嫌歐洲要坐十幾個鐘頭飛機，我又唔想一個人去咁遠，所以先會答應Rosalind一齊旅行有個伴啫！
經過今次事件，我真心覺得一個人旅行冇問題，搵錯人一齊旅行先至係最大問題，我以後唔敢喇！無端端同個女同事去到荷蘭比利時咁遠，又唔check清楚間酒店係雙床房定兩張單人床，我都有好大責任。
Rosalind辭職的確係令我鬆咗口氣，希望佢真係搵到另一份好工，而唔係要避我啦！相信我冇咁大影響力啩！(完）