決定要做2020年月曆嘅時候，好不容易先搵到廠商，不過去到10月24日，幫忙穿針引線嘅朋友send咗個voice message畀我：
「月曆廠商話驚有政治立場，大陸唔會印。」
我：「因為721同831嗰兩格嘅設計？」
「唔止日子唔得，佢話所有相都好有政治立場，同埋啲tagline都係，講好多鬥爭嘅嘢，因為佢哋個廠喺大陸，驚呢啲過唔到審查，佢老細睇完話寧願唔接單，問我哋可唔可以轉晒大部分嘅相，怕太有含意，啲tagline亦都要改晒，你想推倒重來定係點？」
廠商仲提醒，香港大部分印刷公司嘅廠都係內地，呢種審查唔係得佢哋有。
明白嘅，只係感嘆香港已經變成咁，普通一個月曆都可以受到打壓。
輾轉間，我哋再聯絡咗幾個廠商，原來真係好多印刷公司都係同大陸合作，結果一間一間被拒絕，其中一間仲咁講：「幫你印呢個月曆，我廠都畀人封呀！」
有冇咁嚴重呀？印個月曆要封廠？
時間一分一秒流逝，眼見好多人已經印完兼賣完，我呢個月曆仲係未搵到廠商，同你講未諗過放棄就係假嘅。
幸運地，喺好朋友奮不顧身幫忙之下，最後都搵到一間本地印刷公司，造價比起當日第一間其實係貴咗一倍，但我仍然覺得好抵比，因為喺香港印製，釘裝，唔使睇人面色，全部光明正大，咁已經值回票價啦！
有一樣嘢希望各位諒解，由於成個project都超支，所以喺購買過程中我哋冇選擇到任何信用卡或者paypal等平台，因為再有手續費就真係蝕到無止境，大家落完order，記得寫明郵寄地址，聯絡電話，最重要係電郵，我哋同事會回覆你跟進。
PS：呢個月曆擺喺公司有機會得罪老細，請自行評估風險。