其實最近呢個星期，心情真係好差，壓力好似山咁大，今次輪到你哋做樹窿，聽我呻幾句。
辦公室日報所有嘅月曆order已經寄出晒喇，對於買咗嘅朋友，我真心要多謝你哋❤️，另外，我亦要大大力道歉，因為有朋友喺聖誕前收到，有啲就聖誕後，有部分就要1月2日先會到手，喺呢度要衷心講句對唔住🙏🏻🙏🏻🙏🏻。
身邊好多人都鬧我，話如果唔係要幫人簽名或者寫嘢，成件事會快好多。冇錯，簽名寫嘢係導致用多咗好多時間，因為拆完袋要簽，簽完要等一等佢乾，如果唔簽名，左手嚟，右手去，好快就寄晒，但係今次反而錯有錯著，因為我簽到第3日時發現咗一個問題，其中一本月曆，我拆出嚟簽名嗰陣，一拎上手就散咗，原因係月曆嘅圈圈未合實。
有讀者安慰話冇事，唔算爛，照寄啦。但係我覺得成件事就好似你買咗部車，每一樣零件都冇爛，係未組裝好啫，一坐上車會散，如果咁樣都畀顧客，真係好冇責任感，我做唔出。結果，之後嘅月曆我哋要逐件拆開，檢查完再人手合實啲圈圈。
以為咁就完？未呀！後來有讀者inbox我：「你好，我本月曆冇咗3月份……」仲有一位讀者本月曆係5月之後變咗11月（見附圖2），跟住我自己發現有部分月曆係污糟咗（見附圖3），又有月曆係無啦啦有一頁反轉咗，有個別一兩本仲好笑，每個月份都有兩張，搞到成本月曆厚到好似黃頁咁。
你知嗎？每本月曆都要拆開佢合實圈圈，再一頁一頁揭check下有冇漏頁，有冇順序，有冇污糟，每寄一本月曆已經用幾分鐘，呢段時間真係好崩潰，壓力亦都好似山咁大，因為寄件嘅時間畀預期用多咗好多好多好多。
理論上，你愈遲收到係愈穩陣，因為聖誕後寄出嘅月曆，全部都由我親手QC，如果你係較早前收到而又有問題，記得記得要聯絡我幫你跟進。
雖然有批唔合格嘅貨而賣少咗，另外要預留畀有問題嘅朋友作為退貨，令到本身預計嘅盈利唔達標，但係我仍然想履行承諾捐出去，只係星火已經無法接受捐款，請問如果我捐畀立場新聞，大家有冇異議？任何意見我都樂意聆聽。
最後最後，希望大家喜歡呢個月曆，一定一定要用呀！全部tagline都係辦公室日報出過嘅故事，個QR code可以帶你睇返舊post，我愛你哋❤️❤️❤️
呻完。
祝大家新一年身體同埋精神狀態都健康！
已崩潰的聶瞳上