再見喇灰窰角街，終於可以離開呢個鬼地方，喺度返咗3個月工，感覺就好似過咗3年，個樣更加老咗5至6年，仲記得搭電梯落到嚟呢個大廈門口位置，左手邊有個花槽位，3個月前我喺度聽咗個電話，accept埋offer，然後搭咗一趟賊船，而家又企喺花槽前面，難免有啲感觸。
當時見工嘅畫面仍然深刻，因為打破咗個人最快見完工嘅紀錄，由填form去到in完只係25分鐘，點解記得？約3點，填form用咗5分鐘，見一個叫Ashley嘅HR，落樓，望一望錶，3:25pm，所以嚴格嚟講interview過程根本冇25分鐘，等電梯都要時間啦！
Ashley好熱情，當佢出嚟reception接我嘅時候已經非常nice，問我係咪食咗lunch先嚟，問我灰窰角街係咪好難搭車嚟，佢係HR，我又係見HR，將來有個咁平易近人嘅同事都唔錯吖。
「其實你呢個職位就係replace我。」
我：「咁樣樣。」個腦都load唔到點回應。
「呢度好簡單㗎啫，HR淨係做招聘請人，基本勞工法例你都熟啦，唔熟都唔緊要，因為我都唔太叻，有咩打去勞工處好快有人答你，至於MPF呀，出糧呀，有Account做㗎喇。」
我：「咁我想問OT多唔多？平均一個月有幾多position要請？」
「OT就一時時啦，其實做晒啲嘢可以走㗎喇，唔使太過擔心，我對落有個妹妹仔叫Zera，將來佢就係跟你，你可以搵佢scan下啲CV先，Junior職位咪畀Zera去in人囉，你負責in啲Middle Level同Senior Level嘅position。」
我：「明白，介唔介意我問一樣嘢？」
「隨便問吖！」
我：「點解你會resign既？唔好意思，職業病，HR通常會問上一手點解要走。」
「正常呀，你唔問我先驚呀，我梗係明白HR會想了解上一手點解走啦，其實我係移民，搞咗好耐㗎喇，啱啱批咗visa，所以咪要quit咗份工囉，我都唔捨得。」
我：「恭喜你呀！」
「多謝！係喎，你expected salary填$30,000？可以多啲喎，因為老細出面仲有公司，有時都會托我哋HR幫佢請人。」
我：「老細仲有公司？」
「係呀，不如咁啦，大家都做HR，你仲要直接代我個位，expected salary我幫你叫$38,000好冇？」
我：「$38,000？但係我last salary $26,000咋喎，嗌高$12,000會唔會太狼呀？」
其實我唔係想慳住新公司荷包，當時我係驚叫價太進取會影響成功嘅機會。
「我批之嘛，我梗係知道老細底線啦！」
我：「好，你唔覺得太狼死就得喇。」
「傻啦，如果請得你返嚟，都想你做得開心。」
唔怕老實講，當時我係心諗，呢個叫Ashley嘅HR係咪有內定人選，扮招聘叫啲candidate填個唔合邏輯嘅expected salary，然後開閘畀佢一早屬意嘅人嚟，但係謎底好快揭曉，因為搭電梯離開去到樓下啫，我部電話已經響起，係Ashley。
「Hello Candice，想問你下個月1號返工有冇問題？」
我：「下，即係請我？」突然間腳步有啲浮，所以當時我行埋去大廈門口旁邊個花槽傾。
你見到上面嘅引言先知呢度係賊船啫，但我當時係唔知㗎嘛，而且撇除任何陰謀論，正常人去見工份糧由$26,000提到$38,000喎！唔計其他福利，帳目都多咗$12,000，好難唔心動啫！
「咁預你1號返工，因為我就係2號last day，到時同你交接。」
我：「咦，我早啲都得喎，因為我有大假可以扣。」
「唔使，你辭咗職唞吓先啦，同埋1號返工比較容易計糧。」
我：「好呀， 1號見。」
細心回想，Ashley根本就係嗰啲聲稱「移民急讓」嘅業主，氹咗人落坑先，然後就消失得無影無蹤，可惜發現有問題嘅時候已經太遲，因為隔日我已經向公司辭職，返唔到轉頭喇。
（未完待續）