我check返由上年6月開始，就keep住收到一位叫Tommy（已化名）嘅CV，無論我出job ad請Customer Service Executive、Editor、Sales、IT Support、Python Software Engineer、Accountant，抑或係Tax Consultant，我都會收到Tommy嘅履歷，約略數過應該收到超過30次，因為有啲job ad重post又會收多次。
點解咁記得Tommy份CV？換轉係你一年內收幾廿次都會記得啦！我唔係每次都打開嚟睇，第一次收到有睇，第二三次因為仲未認得佢所以都有睇，跟住開始認得就冇睇一排，只知道一出job ad就收到，然後間唔中見到叫Tommy又唔肯定都會開嚟confirm多次，咁可能有其他人叫Tommy又真係適合份工㗎嘛，一陣殺錯良民，搞到另一個無辜嘅Tommy錯失機會就唔好啦！
阿姐叫我唔好理佢，善用招聘網站可以ignore重複CV嘅功能，但我覺得唔需要，人哋send份CV嚟啫，又冇得罪你，唔睇碌過都係半秒，就算開嚟睇又需要幾多時間呢？話唔埋有一日公司真係有個職位啱佢，一block咗就永世石沉大海，何必呢？
不過咁，Tommy之前係做一般文職，完全冇IT底，點解要apply IT範疇嘅工作呢？冇讀過Account，又點解要apply Accountant同埋Tax Consultant呢？最近公司再出Python Software Engineer嘅job ad又收到Tommy份履歷，我決定要打畀佢了解下。
喺電話裡面，Tommy道明咗佢點解咁執意要apply我哋公司所有job，原來佢係我哋品牌嘅fans（我公司出名嘅，同酒店機票之類業務有關），而佢本身亦好鍾意旅行，所以就好想好想入呢一行。
論熱誠，Tommy係有嘅，不過喺education background同working experience方面真係未達到公司設定嘅門檻，因為我哋有系統真係要讀過某啲旅遊相關課程先會識用，我喺電話裡面同Tommy解釋完，再問佢一句：「你會唔會想上嚟見下，認識多啲我哋公司？」Tommy好開心咁答應。
阿姐話過我多餘㗎，佢覺得一個人亂咁send CV已經係傻傻地，我唔係否定阿姐講嘅說話，亦唔係多時間到邊個send CV嚟都約見，我只係覺得作為一個HR，能力範圍就算唔請都可以畀啲指引個candidate，天生我才皆有用，對方可能係諗法同方向錯咗啫，何況send份CV嚟都係求份工，某個層面上佢係冇錯，仲好有誠意。
上到嚟見真人，Tommy的確太細路仔唔夠成熟，佢覺得不斷send CV嚟有機會引起我哋注意，咁策略上係成功嘅，否則佢唔會坐喺我面前啦！
我好細心同佢解釋點解請唔到佢，例如真係要讀過相關課程，舉例你好想做醫生，但都要讀過㗎嘛係咪？真係好想入行，就去搵時間進修，咁樣先可以進步同埋達到門檻，我仲係咁易畀咗公司interview個test佢做，結果Tommy當然做唔到，唔係要為難佢，而係要令佢明白入職要求。
我最欣賞Tommy唔止係誠意，仲有佢願意聆聽同埋理解人哋講咩，最後我同佢行咗office一個圈，送咗啲公司嘅紀念品畀佢（有公司logo嘅Memo Pad同埋記事本），雖然唔貴重，但Tommy收到好開心，仲傻氣咁話終於可以見識下我哋公司係點，其實咁已經夠啦，教咗佢少少見工嘅技巧，畀佢圓個心願，再幫公司做埋branding，根本冇人有損失，我見Tommy都係用咗半個鐘啫，365日入面用得呢30分鐘，我又唔覺得係嘥時間喎。
本來每次出job ad都見到Tommy send CV過嚟，但係最近已經冇再收到喇，我相信佢明白自己爭啲咩，亦清楚如果想入行要做啲咩，呢個結局幾好吖。
投稿讀者：Virgin