我喺大埔工業邨嗰頭做保安，之前公司有兩個保安同事嘈交，其中一個爆粗問候人娘親，畀人小老母嗰個走去同阿頭講，阿頭打算息事寧人，叫爆粗嗰位保安道歉了事，不過佢唔肯，話就算辭職都唔會道歉，結果佢真係遞信。
過咗幾日，爆粗同事後悔，因為驚呢個時勢搵唔到嘢做，不過阿頭話冇得返轉頭。
我私底下幫爆粗同事求情，其實當時自己都在場，兩個都有唔啱，男人嘈交講粗口好小事啫，如果佢肯道歉不如算啦，而家好難搵工。阿頭靜雞雞同我講：「唔係唔想掹，係公司話唔使留，而家保安啲位有個waiting list，好多都係大學生，嚟緊代爆粗同事嗰位都係大學生。」
可能其他人聽到唔會信，不過我之前上堂考保安牌嗰陣，訓練中心全班40人裡面，有20個都係大學生，雖然佢哋未必真係想做，有啲純粹想考咗個牌先，總之全班有一半大學生係真嘅，我公司申請入嚟做保安個waiting list都係真嘅。
因為
我都係大學生
搵食真係好艱難