見工當日，身邊有位好似玉木宏嘅男仔經過，目測冇6呎都起碼5呎10，個HR姐姐送佢出嚟嗰陣明顯心心眼：「辛苦你呀，咁早嚟interview，你識唔識點搭車走呀？嗱，你落到樓下有條快啲嘅路可以去地鐵站……」
雖然個HR好細粒，不過好nice，呢間公司似乎唔錯喎！「玉木宏」笑起上嚟仲charm，我係男仔都暈得一陣陣，佢又上嚟見工，我又上嚟見工，唔知係咪見同一個position呢？如果係，牌面上我可能好輸蝕喎！
送完「玉木宏」出去，HR就擰過去同Receptionist講：「好靚仔呀！你覺唔覺呀？」
Receptionist：「梗係覺啦，頭先佢填form我都係咁望，佢唔做明星真係嘥晒！」
HR：「係囉！做明星啦！其實佢做Model都得，使乜搵工啫！」
Receptionist：「你仲有個candidate，做正經嘢先！」
然後HR終於發現我存在，頭先嗰啲nice嘅表情全部冇晒，黑面兼以冇尾音嘅語氣叫我跟佢入去interview，我仲見到佢同Receptionist打咗個眼色，sense唔到佢哋講乜，總之就係好失望嘅表情，使唔使咁呀！
入到房，HR一句嘢都冇講，淨係低頭睇我啲cert同reference letter，仲要對得好仔細，嗰兩至三分鐘好寂靜，正當我想開口問下需唔需要自我介紹，佢比我快一步，企咗起身講：「你等等。」又係冇尾音嗰種語氣。
等咗一陣，有個男人入嚟in我，佢話自己係呢度嘅老細，呢個就nice好多喇，我企起身握手，佢已經好好笑容，成個interview問咗我好多嘢，而且全程都係充滿笑聲，不過臨尾都係要經歷嗰句：「有消息會叫HR即刻通知你。」
我都唔識得分析有冇機會，HR冇送我出去，不過老細就好好人，可能佢要顧及公司形象啦，點知隔咗一日咁大把，嗰個HR就打嚟問我幾時可以返工，點解我會咁肯定係「嗰個HR」，因為佢嗰種冇語氣嘅死人態度，同我第一次上去見工嘅時候一樣。
返咗工一切正常，除咗個HR黑口黑面，同埋個Receptionist唔打招呼之外，其他同事都冇乜嘢，老細仲係keep住親民mode，仲好鍾意帶我同埋另一個男同事出去見客，有時見到差唔多5點幾，又會請我哋食埋晚飯先走，所以呢份工我不經不覺都做咗接近半年，而家仲做緊。
有一晚又係同老細出去食飯，嗰次得我同佢兩個，老細問我做成點，我話好好，佢又問同事對我好唔好，我話好呀，不過可能兩杯到肚，我好直接咁講：「係Dorris唔知點解唔鍾意我囉，哈哈！」Dorris即係嗰個HR。
老細：「Dorris？哈哈，可能個傻妹見我請你唔請個靚仔呀！」
我估老細指嘅靚仔就係當日個「玉木宏」，你睇下我到今時今日仲記得，就知道嗰位男求職者係幾咁outstanding，男仔都記得喎，正所謂異性相吸，難怪Dorris咁鍾情啦！
我：「唔怪得啦，原來嗰個男仔真係同我爭同一個位，多謝老細，多謝你最後揀我。」
老細：「我梗係揀你啦！你矮吖嘛！」
我：「吓！」我聽咗啲咩？
老細：「我唔高，唔想出到去人哋見到個員工高過我，冇氣勢吖嘛，以前公司都有個靚仔Sales㗎，仲高過同你爭同一個位嗰個男仔，我同佢去人哋公司幾自卑呀！自此之後我請親男Sales都一定唔可以畀對方高過我。」
唔怪得公司啲男男女女全部係哈比人啦！我老細大約164啦，男人嚟講真係唔高，不過我仲大鑊，得160，office啲男同事普遍同我差唔多高度，所以老細雖然得164，但仍然係公司裡面最高嗰個，呢度啲女仔仲嬌小玲瓏，唔使問應該都係有心集合埋差唔多高度嘅人啦！
我：「等我仲以為自己interview表現好啲，所以你先揀我。」
老細：「老實講呢，嗰次個男仔表現係好啲，不過你都唔差，而家你做嘢都ok吖，Dorris就唔使理佢㗎喇，佢知道我一定會揀你，佢明白我嘅喜好，絕對唔會請呢啲高大靚仔，靚仔都算，各花入各眼，但高過我一定唔得，仲有面嘅！」
呢個老細都真係好老實，而家諗返就明白晒喇，唔怪得Dorris當時會喺幾秒之間變臉啦，原來見到我之後，佢已經可以好肯定老細一定唔會請「玉木宏」，再諗返佢嗰陣同Receptionist嘅眼神交流，明，我真係明。
我：「咁點解要叫個靚仔嚟見工呢？你唔見，Dorris咪唔使嬲爆爆囉！」
老細：「點知佢靚仔啫！點知佢幾高啫！而家好多CV都冇相㗎！唔通要人喺CV度講埋自己有幾高呀？一定畀平機會告添呀！始終要見咗先知。」
你又啱！「玉木宏」就死得不明不白喇。
我阿爸阿媽都唔高，直頭係矮，細個唔識，大個我就會埋怨佢兩個點解生得我咁矮，其實有咩點解吖，身高同遺傳都有一定關係，兩老都係5尺，唔通個仔會6尺高咩！其實我讀書已經打籃球㗎喇，可惜……或者咁諗，如果我唔打籃球，可能仲大鑊。
搵到呢份工真係要多謝阿爸阿媽，我第一次覺得作為男仔，自己生得矮竟然有優勢，平時溝女輸晒㗎嘛，呢啲係咪咩「上帝閂Q咗你一度門，總會留返個窗畀你」，起碼我仲可以搵到食，好啦，我原諒阿爸阿媽啦！