有冇聽過豬扒變貂蟬？我公司不嬲係少林寺，HR都冇，請人一般係由department head自己見，埋數出糧就係由老細個細佬負責，但係呢兩年業績好好，多咗好多文件嘢，結果就請咗個女仔返嚟做admin，老細話女仔細心啲喎！
點都好啦！一間老粗雲集嘅公司忽然多咗條女，成個氣氛就會唔同晒，對於已婚或者有女朋友嘅同事係完全冇影響，我哋照樣大大聲講粗口，不過對於其他狗公……單身男同事嚟講就從此變得不一樣，佢哋真係好似前世未見過女人咁。
有一日我好似平時咁同另外兩個男同事爆晒粗傾計，另一位叫Sky嘅男同事忽然中斷我哋。
Sky：「喂，唔好講粗口啦，Coco喺度呀！」Coco就係嗰位新女同事。
我：「我DLLM呀！你不如叫Coco一齊講粗口仲好啦，點解我要就佢呀？」
Sky：「都話唔好講粗口，你咪咁爛口啦！」
痴L7線！唔講粗口唔係我啦！呢度係公司呀，唔係學校呀！
唔止Sky呀！我見仲有啲男同事鬼L鼠鼠送嘢畀Coco，由平時啲大淫狼樣變晒做正人君子，有條木咀叫阿輝，幾餐lunch未找數畀我，而家日日買早餐畀Coco，使唔使呀？
我：「你條木咀上次食譚仔未L畀返錢我喎，嗰次你仲叫到放題咁，三餸又加土匪雞翼又加蒜泥白肉，你前前後後爭我三嚿幾lunch錢呀，找咗先啦！糧尾莫財呀！」
阿輝：「月頭先啦，我都莫呀！」
我：「莫？咁你又朝朝買早餐畀Coco？」
阿輝：「Diu！點同呀！」
哦，有錢買早餐畀Coco冇錢找條譚仔數同埋舊lunch數，得，明晒！
其實Coco真係唔靚㗎！重身，厚肉，咁當然啦，佢哋日日喺office對住梗係另計，呢啲仲唔係豬扒變貂蟬？
我將呢件事同自己條女講，初時我條女都好緊張，以為Coco好靚，後來我畀相佢睇（公司有次食飯大合照），我條女睇完即刻放心晒：「佢幾多磅呀？」幾多磅我就冇興趣知，但坐落嚟一定碎盆骨。
不過咁，公司班單身狗又真係好少接觸女性，平時連樓下個鄉音女看更都可以傾一大餐，Coco冇樣又肥但勝在後生，難怪喺度可以萬千寵愛在一身。
嗱！各花入各眼呢啲嘢我唔評論，可能我條女都會畀佢啲同事話好豬，不過Coco有樣嘢就真係好難頂，就係佢覺得自己喺公司真係萬人迷，有次佢咁樣問我都夠膽死。
Coco：「點解你唔溝我嘅？」
我：「點解我要溝你呀？我有女㗎喎！」
Coco：「唔怪得啦，佢哋都係咁約我食飯，見你冇咩表示，以為你怕醜，原來有女朋友。」
你話佢係咪低9能，咁嘅嘢都問得出口，係喇係喇，全世界啲仔都鍾意你喇得未呀？
我覺得有時人嘅際遇同埋場地舞台真係好重要，唔係講緊做明星，係講緊喺乜嘢時間同環境出現，Coco如果喺其他正常公司做，只要office多幾個女同事，好肯定唔會受到女神式嘅對待，呢鑊嘢佢真係咩信心都返晒嚟！
不過喺我哋呢個淨係得老粗嘅公司出現，點形容好呢……Coco就好似一條大直路裡面無啦啦出現嘅燈柱，係狗都會行埋去聞，罕吖嘛！冇得揀吖嘛！即係一個人餓L咗3日3夜，眼前有嚿白麵包你都會當佢係A5和牛啦！
我add咗Coco Facebook呀，唔係想成為狗公大軍其中一員，更加唔係口不對心想溝佢，我係想睇下公司邊條on9仔椿個頭埋去咋，結果見到叫我唔好講粗口嘅Sky同佢去米芝蓮餐廳；食煙飲酒叫雞無惡不作嘅華仔陪佢去行山，嘩！咁L健康；貨倉個大頭文陪佢去睇舞台劇，好L益智喎；爭我飯錢未還嘅木咀輝同佢去五星級酒店食飯；平時西口西面嘅老細細佬陪佢去睇《正義迴廊》，仲拎住張飛同Coco自拍四萬咁口……
繼續吖，上帝會睇到你班偽君子嘅所作所為，但係溝女還溝女，如果下次再叫我唔好喺office講粗口，我一定會講得更加大聲，返教會啦你班狗公！