有日一位先生嚟到診所。
佢：「未睇過要點做？」
我：「麻煩你俾身分證我登記先呀」
佢拎出身分證，我邊登記邊問：「有冇藥物敏感？」
佢諗咗陣：「藥就未試過，對peanut就有敏感」
隨即候診大堂傳嚟好大聲嘅笑聲，我唔知佢哋笑咩笑得咁開心，所以抬頭望一望笑聲方向。
一對情侶喺度開心笑，男朋友同女朋友講：「咁佢平時咪冇得咁？」配以手指曲成一圈再上下移動。
女朋友笑得更大聲。
你冇嘢呀嘛？我諗我知你哋笑咩啦…
我：「唔好意思呀，坐喺度嗰兩位…你哋係咪聽錯嘢呀？」
男朋友：「咁清楚邊有聽錯呀，男人老狗對自己條嘢敏感，大佬呀呢啲唔駛講俾人知呀？自己知咪得囉，醫生又唔會拎條嘢去執藥」
女朋友又笑。
我：「…先生係對花生敏感」
男朋友：「你唔駛幫佢兜啦，花生英文我唔識呀？甩屎呀嘛，條嘢英文我實識㗎！有邊個男人唔識呀？我條女都識自己嗰度係咩㗎」
男朋友望住女朋友：「係咪呀？你講呀」
女朋友擰擰頭。喂，點搞呀，你女朋友背叛你呀！
坐喺另一邊嘅女士：「讀多幾年書先笑人啦，p-e-a-n-u-t，花生嚟㗎」
男朋友：「你哋真係當我傻hi呀？」
女朋友篤電話，遞部電話俾男朋友睇。
男朋友望一望，個樣沉一沉咁：「係佢讀得衰咋喎，甩屎咪得囉，一個甩屎搞掂啦！」
哦？係呀？你原本連花生嘅英文係咩都唔知，你又實識讀啦～
👉🏻即睇其他診所低能奇觀嘅文章
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。