投稿讀者：何小姐
雖然已經有份工，不過我本身好鍾意睇求職網，如果遇到適合嘅工作亦都會嘗試send CV去應徵，呢樣嘢係一個前輩教我，佢話如果份工做到悶悶地，充斥負面情緒，出去睇下有咩新機遇絕對係好事，若然喺探索過程中遇到另一份好工，咁就唔使諗太多，直接resign轉過去，假設見完工覺得人哋公司條件一般，咁你就會有返動力，知道而家份工唔係太差。
呢種方式同埋諗法對我個人嚟講好work，因為自己無數次做到意志消沉，都係靠呢招重拾鬥志。
點解我一直出去見工，但最後都冇轉工？是咁的，我而家間公司其實係大公司，全香港人都識嘅牌子，只係太多人就會有人事問題，所以做到好谷氣同厭惡，問題係我出去見完其他工之後，腦海中又會浮現一句：「嘩，乜出面咁㗎？原來我公司都唔係太差啫。」
早幾個月我又send CV出去，當時全香港已經煩緊疫情，好多人都work from home，我見工更加有恃無恐，加上而家間公司名氣太大喇，真心講send親CV出去都有得見咁滯，呢次我揀咗間初創公司，正如頭先所講，大公司人事太複雜，如果人工少啲，但人事問題亦相對地少，或者我可以試一試，趁後生闖下囉，唔得再返轉頭應該唔難嘅。
網上interview一次，2nd in就約咗上對方公司，Um…..細到呢……個環境應該只有我而家公司半個department咁大，但我一定要放低呢啲顧慮，初創公司係咁㗎啦！我不斷提醒自己唔好比較，唔好比較，唔好比較……
HR係一個三十歲左右嘅女人仔，佢問嘅問題都係我意料之內：「何小姐，請問你點解會唔做大公司，揀一間細公司嚟應徵呢？」
每次去見工都畀人問同一條問題，答得好有技巧㗎喇，冇辦法，呢幾年嘅interview經驗太豐富，雖然呢幾年都冇轉過工。
呢位女士問咗好多關於我公司嘅嘢，問到已經超越咗interview嘅範疇：「何小姐，我想請教下你呢，入你公司做係咪好難？要interview幾多round㗎？係咪成間office都係鬼佬？」
我冇怪佢，因為睇得出佢唔係為套料而問，只係純粹好奇，所以我都盡量講下自己公司嘅嘢畀佢聽，不過講講下竟然有人上嚟追數，好在對方唔係爛仔，只係兩條西裝友，因為個office實在太細喇，我完全聽晒佢哋講咩：「咁唔掂喎，你老細又唔聽電話，要我哋特登上嚟。」
HR：「唔好意思呀，你打公司電話吖嘛，唔使特登上嚟。」
「搵你有鬼用咩，你都話唔到事，我哋都知你打份工，不過真係要畀個期我，30日又好，60日又好，你講畀我哋知幾時出票啦，我哋都要同老細交代㗎！」
只見HR猛咁say sorry，並承諾會叫老細今日內回覆，卒之打發咗兩個西裝友離開。
好喇！睇嚟呢次interview我要反客為主：「你公司都幾唔掂喎，咁仲出廣告請人，仲叫我上嚟？」
HR：「老細找到㗎，佢唔會走數，但可能公司資金需要周轉，佢一般有拖冇欠，其實我出糧都係咁……不過我哋公司真係好需要何小姐你呢種sales，老細話我哋搵到sales之後，情況會好好多。」
唉！初創公司啲老細同員工有時係雄心壯志，不過根基唔夠紮實呢！
接落嚟嘅時間都係我問佢嘢，問佢平時工作係點？公司財務狀況係點？老細係點？我問問下，佢講講下，呢個HR竟然喺我面前喊，咩事呀？打份工啫，唔使喊喎！
原來佢嚟咗呢間公司未夠三個月，之前有人送蒸餾水嚟要找數，都係佢幫公司出住錢先，直至而家都未claim得返。份糧呢？係就係有出，但就畀合約訂明遲咗7日……仲有，原來佢唔係HR，而係HR + Admin + Clerk + Account +++++++++
本身上個月仲有另一位女同事，但係嗰個女仔可能發覺唔對路，出咗第一期糧就辭職，而家公司得返佢一個，老細又成日出咗去，所以我眼前呢位女士就要兼任晒office裡面所有職務。
不經不覺，原來我哋傾咗三粒幾鐘，浪費咗半日，我冇發脾氣除咗係覺得佢已經夠慘之外，疫情期間work from home所以唔使特登請假，亦係我冇發火嘅原因之一，如果係特登請半日假嚟interview，仲要聽對方講心事，我肯定拍枱走。
其實呢位女士都有家庭負擔，我見佢愈喊愈勁，所以就勸佢搵過份工，佢話最頂唔順係有人追數，接到呢啲電話係咁畀人鬧覺得好無辜，呢一日仲要有人踩上門。
我同佢講：「我公司請緊Admin，你想唔想試下？」
「真㗎？想呀！我唔想再做呢啲初創公司喇！希望可以入到大公司。」
我：「你聽日send份CV畀我吖！但我有一個條件。」
「係咩條件？」
我：「介紹你冇問題，如果你真係入到去做，唔可以同任何人講我哋係見工時認識。」
「梗係得啦！多謝你呀！」
坦白講，最初我都驚佢爆響口，但心諗我介紹啫，唔一定請㗎嘛，何況佢真係幾純，直覺都信得過嘅。
總之而家佢已經入咗我公司做，interview成功！點解咁易？因為Admin個位根本冇登廣告請人，係內部出memo，競爭自然少，至於佢擊敗咗幾多位求職者先in到呢個position，我就真係冇深究喇，請咗就好啦！
又一次，出去interview之後覺得自己份工原來唔差，人事係麻煩啲，但薪高糧準，福利就ok啦，起碼正正常常，又唔會遲出糧，claim咩錢都係當月收得返，唔會拖我。
最最最重要係
員工介紹人嚟見工，成功獲聘入職又做滿三個月，我係有$6000獎金🙈