有讀者問我意見，但係呢種情況我未遇過。
阿Tin（化名）之前搵唔到工，咁啱得悉朋友Jacky（化名）嘅公司請緊人，阿Tin冒昧叫Jacky介紹入去做，後者表示可以引薦，因為佢同阿頭好熟，不過有一個條件，就係阿Tin每個月出糧要畀返$2000佣金佢，為期一年，一年後就唔使。
因為我聞所未聞，所以就問咗阿Tin幾條問題：
「你係自願定被迫？」
Tin：「當時係自願，因為搵咗半年都冇工返，好心急。」
「介唔介意透露人工幾多？我純粹想知道個比例。」
Tin：「人工21000，未扣強積金。」
「你同Jacky本身熟唔熟？係泛泛之交還是朋友個朋友嗰種。」
Tin：「熟，老死嚟嘅。」
「熟人都咁樣？不過你問得我意見，即係你覺得佢唔熟唔食啦！」
Tin：「諗諗下覺得如果係朋友，冇理由每個月要我進貢2000蚊，愈畀愈唔忿氣。」
「不如你同Jacky開門見山傾下啦。」
Tin：「我有呀，佢話我一早答應咗，我再提議過可唔可以減到每個月1000，如果1000的話，我寧願一炮過畀埋淨低嗰幾個月，但Jacky唔制。」
「呢度有兩個層面嘅問題，第一，當初係你自願每月畀2000蚊佢；第二，佢知道你失業半年，就算而家搵得返份工都好傷，咁都仲要拎你每月2000蚊，我認為你要重新評估朋友嘅定義。」
Tin：「如果係你會點做呀？」
「如果係我，首先唔會答應呢項不平等嘅條約，但若然當日係我應承別人在先，我會履行埋個承諾，因為對於Jacky嚟講，佢係同你開條件，有畀Option你，你可以話佢太市儈咁都要同朋友計，仲要每月2000咁大咬，但Jacky又的確冇強迫你去in呢份工，其實當時你正正經經自己send CV去apply唔得咩？」
Tin：「得，佢有出招聘廣告，不過Jacky話就咁send CV入去會石沉大海，由佢親自畀阿頭，再美言幾句話我係老死，受聘機會大好多，咁又的確好順利嘅。」
$2000一個月，連續畀一年即係$24000……我真係唔識評論。
年中我都介紹好多工作畀人，就算冇做headhunt之後都keep住有referral，純粹當幫下身邊啲朋友，如果每個job都收$2000介紹費一個月，我就唔使咁辛苦個個月寫廣告啦~
Tin同Jacky各有各問題，作為局外人都唔知講咩好，但我認為如果介紹份工畀自己個friend，似乎唔應該咁樣計錢，人際關係可以睇得長遠啲，今日你幫人，他日人幫你，當中嘅意義又點止$2000一個月或者$24000一年吖。同樣地，如果同朋友之間有呢類金錢瓜葛，雙方嘅關係可能會變得脆弱，好難keep得長久。
朋友應該互相幫忙，pure啲好，講錢傷感情。