上年9月中失業我都知瀨硬嘢，接近年尾一定好難搵工，本身有一個Offer，返咗兩日覺得唔對路，完全冇人理我，咁你想我學識都要教㗎，但係阿頭叫我問同事A，同事A話唔得閒叫我問同事B，同事B話唔識又叫我問返阿頭，坐足成日好似透明咁，第二日都一樣，結果忍唔住quit咗，然後到12月中先再有兩間公司搵我interview，期間我send咗60幾份CV出去，命中率低到離譜。
12月中見嘅第一間公司其實好鍾意，首先個HR好靚好好人，坦白講見工邊個未試過被冷待，被壓價、被質疑，甚至係踩到你冇晒自信，但呢個HR好有耐心，見到我first round有不足之後，second in之前仲畀咗好多建議，同埋行入個office都feel到氣氛係愉快。
呢位HR唔係提水或者偏心，佢只係用返HR角度去分析，例如教我見Line Manager嗰陣如果講起之前份工，唔需要講咁多廢話，總之睇返佢哋招聘廣告個job description要啲乜，然後盡量喺自己上一份工搵相同之處講返出嚟，因為要搵到工作上相似嘅地方，你嘅說話先會引起Line Manager嘅興趣同注意。
或者呢啲所謂嘅教路你會覺得「鬼唔知阿媽係女人」，不過我哋去interview嗰陣的確受好多客觀因素影響，表現唔多唔少會打折扣，present嘅時候亦會過份用力，往往忽略咗對方唔係要最叻最勁，而係想搵個最合適，最近似佢哋要求嘅員工，所以恰如其分就最好不過。
雖然second in之後冇請，但係我獲益良多，而且HR全程keep住update，就算fail都有解釋到原因，作為求職者嘅我感覺相當良好，知道有另一個人表現更加突出先至會輸，起碼輸得心甘命抵，唔會諗極都唔明然後懷疑自己吖嘛！
因為兩次interview之後我都有打去問feedback，大家傾咗幾次，我隨口話HR你咁好人，最後有冇Offer都要請佢食飯，點知佢竟然答好，有少少出乎意料，不過我都有履行承諾，因為當時仲有另一個interview，兩間公司喺同一區，咁就因利乘便一齊食個lunch啦！
冇諗過食飯會咁好傾，佢除咗同我講interview要注意啲咩之外，大家亦傾咗好多閒計，發覺喜好幾相近，例如好食得辣、鍾意睇溫子仁嘅恐怖電影、都係住黃大仙……等等，其實呢啲都係非常瑣碎或者唔稱得上係巧合嘅事，不過可能互相有好感，講乜嘢都會覺得好投契，男女之間係咁㗎啦！
之前得佢直線，當然要把握機會問佢拎私人電話號碼啦！趁住另一間公司嗰邊有second in，順勢問佢好多見工心得，膽粗粗約星期六日出街，好快就喺埋一齊，其實我識咗佢都係好短時間，冇諗過搵工變咗搵女朋友，問過佢係咪對個個求職者都咁好，佢叫我自己估，咁我當自己係特別啲啦！
投稿唔係想曬命，我最想講嘅係兩件事，首先係見唔成女朋友間公司，但佢教我嘅嘢最終都用得著，因為另一份見成咗，新年前搵到工個心都定啲，至少唔係愛情得意，職場失意，唔使驚出街拍拖都冇錢。
其次係想講塞翁失馬焉知非福，你見我而家講得輕鬆，其實之前quit咗返兩日冇人理我嗰份工嘅時候，個心係好唔舒服，點樣形容呢，即係你明明需要份工，搵到後發現不似預期，辭職嗰下覺得自己好任性，一直懷疑呢個決定係咪做錯，仲會覺得send咗幾廿份CV出去冇回音係抵死，雖然我唔係基督徒，不過都想分享下聖經裡面其中一段：「如果上帝關起一扇門，就不要再死命去推，要相信那扇門後的並不應該是你的，或許是因為外面正有一個颱風，而祂希望你平安。」
2022希望大家都搵到自己愛嘅人，同埋理想嘅工作。