早幾日舊同事打嚟，對方話我有份件，最好收爐前過去拎，否則要等到佢哋年初七返工先有人。為免混淆，以下稱之為B公司，而成件事亦好奇怪，因為我離開B公司已經超過一年半，訂嘢唔會打舊地址，舊客都知我走咗好耐啦，朋友？更加冇可能。
由於B公司舊同事唔敢開我嘅私人件，我又唔知入面係乜，結果就抽時間返去拎，好在同而家間公司只係隔一個地鐵站，唔算山長水遠，放工早15分鐘過去就得。
拎完，打開，係一本幾年前想買但斷晒貨嘅書，另外仲有張卡，署名係我再上一份工嘅舊老細，即係B公司再之前嗰份工，以下稱為A公司，唔想大家睇得咁亂。
回帶三年前，我就係由A公司個老細介紹去佢朋友個朋友間B公司做，由於近年大家冇乜聯絡，佢以為我仲做緊，所以將本書直接寄去B公司，打開份件見到嗰下真係好開心，幾年前我周圍問人有冇方法買到，其實隔咗咁耐已經冇咗回事，亦唔係特別想要喇，估唔到舊老細仲記得。
當年A公司生意唔好，一直有做唔住嘅消息傳出，舊老細冇隱瞞，好坦白咁向大家講發生緊咩事，又捉我哋幾個比較senior嘅同事入房傾，睇下可唔可以安排得好啲，講明租約期滿就正式結業，嗰陣仲有幾個月就農曆新年，真係幾唔開心㗎！
舊老細提早三個月叫所有同事搵定工，講明搵到工即走又好，留到最後一刻又好，總之賠償都會畀足，佢亦有四出拜託朋友請自己啲員工，算唔話得啦，舊老細自己都有好多嘢要煩，但仍然盡量幫同事嘅前路打算，所以大家冇乜怨氣，仲心懷感激。
A公有廿幾人，大約有一半人自己搵到工提早離開，而我就係靠佢朋友個朋友介紹而入咗B公司，除咗個別一兩個同事話想唞唞先再決定之外，基本上所有人都有著落，我個心都定返啲，過年後即刻有新工返，人工又唔係差太遠，時間緊迫下收貨㗎喇，始終公司執笠個老細唔係奉旨幫同事搵埋新工。
當時A公司提早咗收爐，原因係租約期滿，所以直接close埋，仲記得大家叫到會喺公司食嘅時候充滿離愁別緒，我自己做咗4年，有啲同事仲耐，轉眼間就各奔前程，真係好唔捨得所有人同個環境，加上揀正收爐當日結業兼拉閘呢，個衝擊係特別大。
呢幾年大家都畀個疫情害得好慘，做唔住嘅公司好多，但其實執笠結業係咪一定會搞到不歡而散，又或者啲錢唔清唔楚拖拖拉拉呢？其實真係未必㗎，好似A公司呢個舊老細咁，佢喺自己能力範圍內已經處理得最好，起碼每一位同事都唔會有hard feeling，呢啲就係好來好去。
A公司終極收爐嗰日我都問過舊老細，會唔會考慮再出去搵嘢做，但佢話自己已經50幾歲，好難再搵工，而且做咗生意都一段日子，未衝得過打人哋工嘅心理關口喎！舊老細仲自嘲唔識得馬死落地行，其實都明白嘅，而且人各有志，可能佢當時又有另外一啲諗法呢！
各散東西又各有各忙，唔好話同舊老細，就連A公司其他同事都好少聯絡喇，職場係咁啦，大家都要搵食，加上呢一兩年咁少社交活動，friend都見少咗好多，何況係舊同事呢，不過下次記得問清楚先寄嘢畀我吖嘛，搞到我又要上B公司一轉……講笑啫，其實呢份心意好感動。
我喺B公司做咗一年半之後跳槽，冇咩特別原因，都唔係嗰度唔好做，純粹有headhunt挖角，職位同人工都跳多一格，所以先會轉嚟而家做緊呢間公司。
打電話畀舊老細講多謝嘅時候，得悉佢已經東山再起搞另外一啲生意，雖然同以前做開嘅嘢完全唔關事，不過咁好嘅老細係值得成功，想喺度祝佢生意興隆，再創高峰！