有冇試過遇到一啲人，個樣好面善，基本上你肯定見過，但你又講唔出係邊個？話說早兩個月去見工，in完個HR，即刻in埋個Manager，估唔到大家咁投契咁好傾，而且硬係有種仿如隔世嘅親切感，我覺得之前係認識佢，可惜諗極都冇頭緒。
「你好熟口面喎！」正當我好疑惑嘅時候，個Manager都係咁樣同返我講。其實佢話就話係Manager，不過同我年齡唔係差太遠，我三十中，佢就睇落大我一兩年左右，所以我先從住嘅地方，仲有小學中學著手，有理由相信大家曾經住埋同一條邨，甚至曾經係同學或者師兄弟。
我：「你係咪住愛民邨？」
Manager：「唔係呀，我都諗過你係咪街坊，不過睇返你張form係愛民邨，我又唔係嗰頭㗎喎！你有冇踢波吖，我踢開啲業餘聯賽，係咪比賽見過？」
我：「踢波唔啱，不過好鍾意睇，呀！你見到我resume上面啲舊公司，會唔會合作過？隔籬team同事？客？」
Manager：「我見到，但係冇印象喎……」
我：「係囉，頭先入嚟見到你已經覺得好熟。」
大家都講到口唇邊，又講極都講唔到，結果我哋又傾返見工嘅嘢，我都幾有信心可以勝任呢個position，因為當中嘅requirements真係食正自己嗰瓣，個Manager都話我嘅experience好solid好match，仲驚嘆我個expected salary點解填得咁低。
我：「冇計啦，而家間公司出咗名係同行最低，所以我先至想轉工之嘛，有個friend一樣年資，人工多我一大截，不過因為last salary低，expected salary唔敢填得高，多過25%好似太誇張。」
Manager：「都唔係嘅，最緊要請返嚟嘅人啱用，我幫你改，多少少其實冇問題。」
咁慷慨，又一見如故，傾完公事仲講下其他話題，呢份job應該high chance啦！
我：「你踢業餘聯賽應該幾勁喎，我有個friend都係踢香港乙組，不過唔知而家仲有冇踢呢？」
Manager：「勁喎，邊隊呀？」
我：「隊波好似叫晨曦，我都係睇過佢一次，仲要踢人造草場，啲乙組都幾狼㗎！下下波到人到。」
Manager：「乙組好犀利㗎喇，我哋落場唔夠踢，不過人造草好容易傷。」
喂，呢份工掂啦！大家咁啱嘴型，忽然間我醒起喺邊度見過Manager！
我：「咦！係咪……迎海？孖八得唔得？幾有緣喎我哋，咁都撞得返！」
Manager：「呃……我……夠鐘開個會，因為仲有人要in，有消息會通知你。」
仆街喇！因為成程interview都覺得佢好面善，我真係諗得好辛苦，突然醒起即刻衝口而出，講完我已經知道呢次屙L！
迎海係旺角一間樓上桑拿嘅名，我應該係見工前一個月左右去過，當時我想mark一個技師嘅number係88，因為呢啲場通常將啲最炙手可熱嘅囡囡編成8, 18, 88，好意頭又易記，紅牌先會配得起呢啲號碼，不過當時個keeper同我講8同18都冇返工，而孖八(88)就畀隔籬嗰位先生book咗，如果我要做孖八就要等得比較耐。
當日「隔籬嗰位先生」，就係我而家見緊份工「眼前呢位先生」，亦即係個Manager，佢嗰時同我一齊著住浴袍坐喺梳化等入房，仲同我講唔好意思，然後我哋傾咗好耐，因為孖八好旺，而我mark咗另一個囡囡又做緊嘢，8, 18, 88呢啲number係骨場最有保證嘅邏輯同埋理論，就係個Manager當晚灌輸畀我。
嗰次喺迎海桑拿我哋都好好傾，唔係傾工作，唔係傾香港乙組，我哋係傾囡囡number典故、以前去開邊個場、鍾意邊啲囡囡、曾經中過咩伏……孖八真係好旺，搞到我哋吹水吹咗差唔多半個鐘，難怪會咁熟口面，又咁啱嘴型。
後來我入房先，仲有同佢講bye bye，估唔到大家咁有緣會再遇到，差啲唔記得講，迎海係邪骨。
我一直都好想知道迎海個孖八係咪真係咁正，但我冇再去喇，所以見工突然醒起佢就係試過孖八嘅人，衝口而出就問佢孖八得唔得，其實我問完已經知道呢次仆街喇！
又話一有消息通知我，搵笨！兩個月後嘅今日都冇收到通知，好在我已經搵到另一份工，只係唔明白點解個Manager咁死板，因為尷尬先唔請我？試諗諗有個下屬同你志趣相投，間唔中放工可以一齊揼邪骨，咁樣唔係仲開心咩？何況嗰次我都有份去，唔通咁蠢唱你咩，咁咪即係唱埋我自己！