今朝有個求職者上嚟見工，in咗5分鐘唔夠就問可唔可以去洗手間，當然可以啦！我教埋佢出走廊之後要點行，但呢個男仔孭埋背囊離開會議室。
我：「你唔擺低個袋？」
「有銀包喺入面，我想跟身。」
有道理，費事一陣唔見嘢口同鼻拗。
反正有少少急，你去我又去囉！我搵receptionist交代一聲先，驚個求職者返嚟唔見咗我，交代完踏出公司門口，轉個彎竟然見到呢個男仔等緊𨋢？？？
我：「咦！洗手間喺嗰邊喎！」我指住反方向，示意佢唔需要搭𨋢，而個男仔只係望咗我一眼，再點一點頭，跟住就入咗𨋢……
做咩呀？你去邊呀？我呆咗企喺原地，盤算發生緊咩事？難道我表達得唔清楚，佢以為要搭𨋢先去到洗手間？而個畫面又有少少詭異，我撞邪呀？
百思不得其解，返入office同幾位同事講呢單嘢，佢哋一致認為個男仔唔鍾意份工，所以求其搵個藉口閃，後來都證實咗係㗎喇，因為個男仔已經消失得無影無踪。
其實份工唔啱冇所謂呀，可能係我in得唔好，令對方反感亦唔出奇，但可唔可以直接講聲唔適合先走呀？有需要借尿遁？
我唯有call返個男仔，不過打咗好多次都冇人聽，出email佢又冇reply，唔緊要，佢一定會後悔，一定會搵嚟返我，100%肯定！
晏晝大約3點半，呢個男仔真係再出現，佢直接上嚟我哋公司，態度都幾好啦，仲係咁講唔好意思，係咪覺得我料事如神呢？因為個男仔啲cert全部未拎走，今朝佢填完form畀我個Assistant影印啲cert同reference letter，未拎返正本已經借尿遁走咗，所以我先會call佢咁多次之嘛！
你唔見我份工好閒，但冇理由全部證書都唔要啩！