我朋友喺一間爛公司做，基本上全部人都係皇親國戚，得佢條team係逐個逐個招聘返嚟，完全冇任何裙帶關係。後來佢同自己team班同事發覺，所有豬頭骨都係由佢哋做，除咗工作量多，日日OT之外，仲要經常畀一班皇親國戚指指點點兼夾冷暴力對待。
呢種情況維持咗一年，期間佢條team啲同事多次商討幾時辭職，不過都係得個講字。過埋農曆新年review人工，全公司都有得加，唯獨佢哋呢個最多嘢做嘅部門凍薪，如是者佢哋又再傾係咪應該resign：「不如睇多年啦！」、「其實都唔係咁難做啫。」、「唔想再搵工，求其有份嘢做就算啦！」、「忍下啦！」、「搵到新工先啦！」、「等佢炒我賠一個月，炒我吖炒我吖。」
不過我朋友忍耐唔住，冇等埋其他人就自己遞信請辭，成班同事繼續齋講冇行動：「比你快我一步。」、「過埋5月我都遞。」、「呢幾日都要執下CV先。」、「問緊個friend拎辭職信sample，佢做hr，啲格式正統啲。」、「去埋個旅行返嚟就走。」
隔咗一排，公司竟然先發制人炒咗佢另一位同事，原因係要精簡人手，再過一個星期，又炒多兩個，原因係要開源節流，而且係最絕嗰招－－－公司唔賠錢，因為提早一個月通知，麻煩各位坐足一個月離開。
各同事開始轉口風：「一早估到佢想郁我哋啦！」、「咁pk唔補錢，最尾幾日就玩嘢請假。」、「我一陣send CV啦，搵到工唔會坐足一個月。」、「食屎啦！我聽日就開始日日遲到，吹呀！」
而我朋友，其實已經搵到新工喇，4月頭就履新。
我聽過人講，當你想做一件大家都唔敢面對嘅事，最好嘅方法就係勇往直前，因為你愈驚、愈縮、愈後退，聽住其他人喺隔離咿嘩鬼叫，感覺只會更加不安，倒不如快刀斬亂麻，撇撇脫脫，速戰速決。
雖然我冇用過呢個理論嚟辭職，但用嚟處理一啲難題嘅時候，又確實係幾work。