本人女，噚晚入場睇《拉闊》，見到同事個老公拖住另一條女。
因為早排annual dinner先見過，同事老公本身已經好高好易認，個樣仲要似某KOL，annual dinner當日都有其他同事話勁似，所以印象特別深刻。
綜合以上特點，加上同事老公位置喺我斜前方，基本上已經好確定。問題係我同嗰位女同事平時完全唔熟，冇仇，但亦冇特別交情，大家唔同部門，日常Hi-Bye嗰類。
究竟我應唔應該同佢老婆，即係我個女同事講呢？其實……我有偷偷影咗相，雖然唔太清楚，不過要佢認自己個老公照計唔難。
我怕自己太多事，你點知人哋夫妻關係平時係點，同埋一陣走去篤爆人，如果個老公氹返個老婆，我就變咗金手指，到時喺office撞口撞面好尷尬。假設氹唔返，又怕人哋老公找我晦氣，始終控制唔到個女同事返去點同老公講。