茄喱啡(下)老細想要高海寧電話

Yannes見完份工之後同我講,對方喺整個interview過程裡面幾乎冇講過份工係點,亦冇問過佢任何工作技能方面嘅問題,只係不斷八卦娛樂圈嘅事,例如邊個同邊個係咪拍拖?嗰個男明星平時份人係點?某個女明星係咪畀人包?

Yannes:「個HR問我有冇同明星合照,叫我拎畀佢睇,又問我可唔可以拎到張智霖簽名。」

我:「咁嘅情況……」

Yannes:「個老細後尾又入埋嚟見工,除咗問埋啲娛樂新聞,仲問我有冇高海寧電話。」

我:「想要高Ling電話添呀……」

Yannes:「我唯有苦笑話自己只係茄喱啡,唔會有大明星嘅contact。」

後來個客打嚟話想請Yannes,我代為婉拒,但問題係獵頭公司真係冇職位啱Yannes,我哋嘅客好少會搵中五畢業,除咗隔籬專搵日薪promoter同event helper嗰條team,呢一part除咗唔係我嘅範疇之外,亦唔係Yannes想搵嘅工作。

兩星期後,Yannes向我透露佢見咗幾份工都冇回音,由於生活迫人,佢已經唔再執著於搵office工,只係見咗一間賣衫嘅boutique,唔請,in咗間cafe嘅侍應,唔請,另外有間賣內衣嘅舖頭,都係唔請,其中一個僱主仲講咗句:「其實好奇想見下你係邊個咋,我未識過人係拍戲。」

由於過去咁多年只係做演員,冇搵其他工作,所以Yannes唔明點解有僱主睇晒份CV,但係上到去見工先嫌佢冇相關經驗:「乜佢哋唔係覺得啱先會叫我interview咩?去到先好似第一次認真睇返CV,咁係正常嘅?」

我:「做法唔正常,但喺香港又好正常,我都唔知點解釋,總之唔止你一個會遇到呢種情況。」

Yannes以往嘅演員經驗反而成為佢嘅搵工障礙,結果佢嘗試apply馬會嘅電話投注工作,過幾日就會去interview,正正喺呢個時候,有一位喺加拿大讀書時認識嘅朋友返咗嚟,佢打算喺香港開公司,由於係Startup,開頭真係得兩三個人,需要搵個本地人幫手。佢係嗰啲半唐番,識講流利中文,但唔識睇,最正係呢位朋友完全唔熟悉香港娛樂圈,佢根本唔睇香港電視,梁朝偉嗰啲級數就梗係識啦,電視藝員就未必識喇。

我:「中五畢業,冇文職經驗有冇問題?」

半唐番:「冇問題,佢識中文就得,我都可以教佢英文,不過始終係細公司,好多嘢都要幫手做,你個candidate係女仔?佢介唔介意?」

我:「應該冇問題,我會同佢講清楚先,好肯學好肯做,性格都唔錯㗎!」

半唐番:「不過我係用朋友身份搵你幫忙,比唔起佣。」

我:「得啦!私人嘢,唔會收你佣啦!」

半唐番:「咁你問下佢聽日有冇時間見面吖。」

我:「好呀,多口問句,你知唔知邊個係高海寧?」

半唐番:「Who?」

我:「咁Ok喇,我幫你約個candidate啦!」

建議Yannes如期見埋馬會份工,等自己有個比較,而最後佢揀咗我朋友間Startup公司,或者真係貪嗰度人少少(除咗我朋友就只得另一位女員工,加埋Yannes都係得3條友),壓力冇咁大。

雖然呢隻job唔係獵頭公司嘅生意,但係我都有分別打畀嗰位半唐番朋友同埋Yannes,跟進下佢兩個work得開唔開心,或者有冇咩問題,慶幸一切都好順利。

嗰間公司另一位女同事都認得Yannes係電視藝員,不過完全冇八卦問東問西,反而講過一句:「而家幾好吖,攞啲文職經驗,將來想轉其他工作都容易啲。」

後來嘅情況係,Yannes冇轉其他工作,到呢一刻都仲做緊嗰間公司,聽講佢幾開心,又學到好多嘢,本來我朋友間Startup公司諗住再擴展,可惜遇上疫情,所以勒一勒唔想谷得太快,穩穩陣陣過埋呢一年先打算,都ok啦,最緊要大家搵到食,唔好餓親就得喇。

Yannes喺同事鼓勵之下(其實都係佢老細同另一個女仔😂),報咗課程進修英文,佢話呢間公司對佢嚟講係「啱啱好」,因為人少少,有咩唔識會開心見誠問,完全唔使怕瘀,過往有段日子對自己冇晒信心,而家就慢慢累積自信,佢好希望呢間Startup可以愈嚟愈成功,愈做愈大。

Yannes:「以前比人叫茄喱啡,個心唔多唔少有啲自卑,不過而家唔會喇,就算有人再咁樣叫我都冇乜太大感覺。」

其實我哋係咪做演員都好,日常生活中都有人當我哋係茄喱啡,亦有人當我哋係主角,世界太多人,根本控制唔到其他人點睇同埋點諗,最緊要自己唔好睇低自己,我當年拎住記者經驗去搵文職嗰陣一樣咁傍偟,而家總算捱過咗,關鍵係踏出嗰步之後唔好縮,有決心行出去,就會發現有前所未見嘅風景等緊你。

茄喱啡(上) 你個candidate係御用妹仔嚟喎
https://hkofficedaily.com/?p=17293

error: