「喂，有明星搵你見工呀？」
做headhunt嘅時候，每當candidate上嚟interview，receptionist都會打電話通知我哋。
我：「你畀form人哋填住先啦，我15分鐘後會入房見㗎喇。」
一向八婆嘅Receptionist仲想打探更多資料，但我冇理佢，匆匆收線繼續做嘢，因為15分鐘之後就要in人，真係有啲趕。
嗰陣有份工要搵junior level嘅人，返office，唔需要相關經驗，待遇係fresh grad價，咁我咪直接畀啲fresh grad嘅candidate去見囉，點知個客見完一個已經話唔適合。
客：「噚日嗰個太小妹妹喇，有冇成熟少少？」
我：「成熟就唔係fresh grad價喇喎。」不如你成熟少少仲好啦！
客：「我意思係轉行嗰啲都得，中年就業嗰啲呢，mature啲。」
咁你join勞工處嗰啲 「中高齡就業計劃」咪得囉，又要慳，又要成熟，又要fresh grad價，又要搵headhunt，有時啲客真係好難理解，偏偏每日都會遇到好多呢類client。
剛剛遇著啱啱，當日朝早我收到份CV，嗰位candidate寫住喺電視台工作過，之前係合約藝員，我打去做個簡單嘅phone interview，覺得呢個女仔好有heart，所以就約佢上嚟見面，由於係上午約，下午見，我真係冇時間去深究對方係邊個？有咩演出作品？加上冇相，名字又陌生，見面先再算啦。
我：「Hello，你係Yannes？」敲門入房之後嘅例牌對白。
Yannes：「係呀，你好，多謝你抽時間見我。」
好客氣，又好眼熟，曾經喺電視見過佢，參演過咩劇呢？一時之間諗唔起，不過呢啲並唔係重點，我隨即就向Yannes解釋下份工係做啲乜，再三強調個客offer嘅係fresh grad價錢。
Yannes：「OK㗎，冇問題，其實我搵工搵咗好耐，自己又得中五畢業，英文唔好，文職工作冇人請我，所以有office工好開心㗎喇，我有啲怕做侍應或者Sales，仲未接受到出面啲眼光，好多人認得我係茄喱啡……」
我：「唔好咁講啦，演員都係一份工，同我做headhunt咪一樣。」
Yannes：「你客氣啫，我喺街聽過好多次，有時搭車都聽到附近有人細細聲講～～～呢，嗰個茄喱啡呀～～～不過都好正常，其實我有啲親戚都係咁講，佢哋唔會叫我做演員，有次食飯仲有個長輩直接問我，茄喱啡有幾錢一個月呀？哈哈，屋企人都係咁。」
基於尊重，我覺得自己唔應該跟住笑：「係咁㗎，我未做headhunt之前做過記者，親戚一樣問我狗仔隊係咪要日曬雨淋？我都唔係做娛記，我係體記，不過講親做記者，每個人嘅即時反應就覺得我要追星飛車偷拍。」
Interview嘅氣氛好愉快，Yannes亦係一個開朗、謙虛，同埋有禮貌嘅人，我覺得個客會鍾意佢，結果幫佢哋arrange兩日後面試見工。
可惜劇情嘅發展並唔順利，兩日之後，率先打畀我嘅唔係Yannes，而係個客。
客：「你個candidate好得意喎，我認得佢係做啲御用妹仔角色，夜晚有套重播劇都有佢，好似係做啲公司職員仔，冇對白。」
我冇興趣知，所以直接問：「咁即係請定唔請？」
客：「等我問問先，本身老細唔in呢類junior level，但頭先佢行過見到你個candidate好熟口面，知道係茄喱啡，八卦之下入埋嚟join interview，所以我要問下老細覺得點，佢而家行開咗。」
我：「你哋唔好叫人茄喱啡啦！」
客：「OkOk，演員囉，一陣覆返你。」
然後我就打畀Yannes，問下佢見完有咩感覺，不過Yannes答：「唔……我覺得呢份唔係好適合自己。」
我：「點解呀？」係咪個客兜口兜面叫人茄喱啡？
Yannes：「因為佢哋頭先好怪，見工都冇講過任何工作嘅嘢，反而問咗好多奇怪問題，仲有啲奇怪要求……」
我：「咩問題同要求咁奇怪？」
（未完待續）