外賣送到嚟漏晒，返上屋企另外搵個碗裝起兜麻辣麵。
負責送外賣係一位20出頭嘅男仔，前前後後講咗十幾聲對唔住，講到我都唔好意思，其實真係唔介意，我嘅諗法係～～～倒瀉唔係佢想，亦未必關佢事，可能係舖頭包得唔好，包得唔實，又或者本身個兜爛咗，如果有得揀，佢又點會想拎住一袋漏晒湯嘅外賣呢？佢自己都可能會整污糟㗎。
呢單嘢令我諗起好多年前返港島區一間公司，當時係lunch time，出面落緊大雨，我哋幾個同事好唔想留喺公司，落狗屎都要出去食，猶豫咗20分鐘決定好好醜醜都喺樓下食，出門口等電梯落去嘅時候，另一架電梯上到嚟，有位伯伯拎住袋外賣撳隔離公司門鐘，個伯伯唔係而家嗰幾間外賣公司員工，係普通茶餐廳伙記嗰種。
出嚟開門個男人西裝筆挺，但係一開口就鬧個伯伯，內容大意係好遲先送嚟，得返半個鐘多啲食飯，鬧極唔停仲夾雜住好多粗口，又唔肯接袋外賣，伯伯唔知點算好，進退失據企喺度猛咁講對唔住。
因為啲粗口愈嚟愈難聽，除咗鬧人阿媽，仲話難怪對方一世送外賣，結果我哋幾個同事有電梯到咗都唔搭，行埋去勸個西裝友唔使咁躁，始終出面落緊大雨，餐廳可能好多單，送遲咗冇人想，不過西裝友當我哋透明，繼續用粗口鬧個伯伯，同事就拎銀包出嚟話可以要咗袋外賣，由我哋畀錢。
西裝友最後話隨便我哋，佢唔會要袋外賣，不過一定打返去餐廳投訴個伯伯，而伯伯就有啲欲哭無淚，繼續不斷講對唔住。
唔係話個伯伯或者間餐廳遲咗送嚟冇問題，只係有時可以因應唔同嘅情況去處理。其實喺最大雨嘅日子，30幾40度畀屏風樓遮到完全唞唔到氣嘅香港，我哋坐office涼冷氣當然舒服啦，但係送外賣或者做速遞嘅朋友都幾辛苦㗎。
幾個月之前，我試過同一晚喺同一間外賣公司order兩次嘢食都送唔到嚟，第一單等咗成個鐘，對方打嚟話倒瀉晒，再order多一次，今次揀另一間餐廳，間餐廳直接打畀我，話外賣哥仔唔肯送，我覺得好奇怪，因為平時都好順利，後尾畀我發現原來佢哋嗰幾日有工業行動，抗議公司剝削收入，坦白講我係無辜，亦都有唔開心，但我知道原因會體諒，冇辦法，只好變陣直接打去樓下間茶記叫外賣。
好多人話而家送外賣待遇唔差，疫情下仲賺得多咗，又或者話之你內部發生咩事，總之準時送嚟就係本份。以上兩點我都知道，只係想表達外賣員唔係需要同情，而係需要尊重，職業無分高低貴賤，任何工作都值得被尊重。
望住手上呢袋外賣，我又諗起當年條西裝友，唔知個伯伯仲有冇做呢？