返咗新工一個月已經泥足深陷，我意思係深深愛上呢間公司，記得HR打嚟約我見工嗰陣喺電話度問：「你有冇養寵物？會唔會驚貓同狗？對動物啲毛有冇敏感之類？」
雖然我唔係見一間同寵物有關嘅公司，不過佢咁問我都知道有啲嘢，其實我唔驚狗，但有少少驚貓，我驚佢哋啲爪，只係我更加驚窮，所以當時就答冇養寵物，不過唔驚貓同狗，亦都冇敏感。
上到去真係嚇一跳，因為入門口已經有隻狗吠我，雖然只係好細隻嘅狗仔，但係冇心理準備之下被吠，嚇親都好正常啫！行入間房嘅時候仲有兩隻貓喺影印機上面睥住我，見工啫貓大佬，我冇惡意㗎！
Interview過程順利，HR亦講明呢間公司好多同事會帶寵物返工，因為唔係人人接受到，所以一定要問咗ok唔ok先，最緊要大家做得開心，而其實請我個position之前已經一年冇請過人，呢度嘅同事做得好穩定，有空缺只係因為上一手要移民。
HR仲話，真係有求職者喺電話聽到佢公司有寵物已經耍手擰頭，所以講清講楚最好。
Ok啦！貓貓狗狗啫，又唔係獅子老虎，同埋我真係接受到。
結果我順利入咗嚟做，聽返同事講，係老細最初帶埋隻狗返工先，跟住有同事屋企都有養狗，膽粗粗問老細可唔可以帶埋返工，老細又唔介意喎，唔知係磁場效應定係點，跟住就愈嚟愈多同事帶寵物返工喇。
呢度都有啲同事好似我咁，本身唔係狗癡貓癡，但又唔驚寵物，所以都習以為常，仲同人哋啲貓貓狗狗玩得好開心，就好似玩人哋個BB一樣，唔使負責養，淨係負責玩，其實都幾爽㗎！
佢哋唔會畀寵物留喺office過夜，部分同事亦唔係日日帶返工，不過有幾個就真係每日都帶狗仔同貓仔返嚟，唔知係咪呢個原因呢，同事之間感情真係好好，有寵物喺度真係連人嘅戾氣都冇咁重。
我咪話有少少驚貓嘅，因為成日覺得佢哋嬲又出爪，開心又出爪，連伸懶腰都張開啲爪，真係有啲不安，但久而久之都慣咗同啲貓相處喇。貓星人好得意，有啲同事主動撩佢哋玩就唔理人，好似我呢啲敬而遠之嘅，班貓星人又要特登痴埋嚟，其中一隻仲好鍾意跳上我大髀發呆同瞓覺。
問過點解業主容許我哋公司帶寵物開工，原來呢個工廠大廈單位係老細好耐之前買咗，哦，原來老細自己就係業主。
不過同事啲愛犬同愛貓又真係冇影響到呢棟工廈其他人嘅，佢哋基本上好乖，係有時狗同狗之間玩會吠下，但絕對唔算嘈，貓貓相對嚟講就更加安靜啦，係成日推我啲文具落地囉，不過喺我眼中，佢哋做啲咩都咁可愛㗎喇。
狗狗吠得最勁嘅時間就係6pm，真係好有靈性㗎！應該係日積月累慣咗搭正6點就走，有幾隻狗仔係會一夠鐘就吠，好似提醒我哋放工咁，非常搞笑，有幾次我做到入晒神，一聽到佢哋keep住吠就知道夠鐘收工，你話佢哋係咪好抵錫呢！