對於老闆，其實我唔係好熟，因為佢大部份時間都喺自己間房，而且我呢啲small potato根本冇乜機會同佢對口，講真老細未必噏得出我叫咩名，但係對於老闆娘呢，感覺就親切好多喇。
老闆娘係典型少奶奶，佢並非公司職員，主要工作就係shopping，因為老闆娘平均一個星期會上嚟一至兩次，每次都攞住幾袋名牌，有時仲會show啲戰利品畀我哋睇，最正係老闆娘每次上嚟Office都會「派彩」，逢出現就萬歲畀錢大家叫下午茶，形象好親民好慷慨。
除咗請食嘢，老闆娘仲會送啲小禮物畀我哋，有時人人有份，有時就個別送畀一兩個同事，我入嚟做咗唔夠一年已經收過佢一隻Le Creuset 水杯同埋一個無線藍牙耳機，雖然唔係AirPods，不過偷偷check過，個耳機喺街都賣緊五百幾蚊。
呢度個個都讚老闆娘好人，佢又唔理公事上嘅嘢，又肯紆尊降貴同我哋啲小角色傾計，次次返office探老闆都使錢送禮物請食Tea喎，打工仔梗係受落啦，點知有個同事同我講：「少女，你太年輕喇！無事獻殷勤就算唔係非奸即盜，都肯定必有所圖，細細個讀書都有教啦！」
我：「使唔使咁陰謀論呀？其實佢使乜討好我哋啲小職員吖，當老闆娘一星期上嚟兩次，每次請呢度幾十人食Tea平均$1000，一個月都要使$8000，仲未計失驚無神送畀大家嘅禮物。」
同事：「就算老闆娘每個月拎一萬蚊出嚟請食Tea，對佢嚟講都係散紙，你睇下佢啲名牌袋先啦！至於禮物仔，你唔覺老闆娘好有部署，好似輪住送畀唔同嘅同事咩？更何況呢啲咪又係老闆嘅錢，佢用老公啲錢收買同事人心，再幫佢箝制返個老公，好高招㗎！」
我：「咁複雜㗎咩？有冇需要呀？」
原來老闆以前「疑似」同一個秘書姐姐搞埋，疑似啫，聽講當事人係從來冇承認，但點解同事會知呢，因為嗰陣老闆娘曾經衝上嚟office同老闆鬧交，雖然閂埋房門，但出面嘅同事多多少少都聽到，後來嗰位秘書姐姐就消失咗，表面上係自己遞信，實際上係「被辭職」。
同事：「Admin Department嗰三條女都係老闆娘嘅線眼，佢哋收老闆娘好多香水辦同埋護膚品試用裝，秘書姐姐單嘢發生時，我嗰陣啱啱入職有幸見到咁經典嘅一幕，後來發現有啲嘢好巧合，記唔記得有個客鬼鬼地好似張曦雯？」
我：「記得，我係女仔都覺得佢靚，仲要身材好好，次次上嚟啲男同事都喺度討論。」
同事：「每次翻版張曦雯上親嚟，老闆娘半個鐘頭內必定出現喺Office，你下次留意吖。」
當時我半信半疑，不過後來特別留意，又真係咁巧合喎！再聽返嗰位同事講，呢度好多人除咗係老闆娘條針之外，仲有個別同事會同老闆娘私下接觸。
我：「你點知呀？」
同事：「HR個Jenny同我好熟，大家都住將軍澳，差唔多日日放工搭同一架巴士，佢話佢人事部阿姐有老闆娘WhatsApp，成日收老闆娘啲超市現金劵，所以自從秘書姐姐事件之後，公司請親返嚟啲女都係豬西核彈頭，個個甩皮甩骨。」
可能當時聽得太投入冇為意，夜晚返到屋企再諗清楚啲，我入咗嚟做一年，咪就係秘書姐姐事件之後其中一位豬西核彈頭囉！我投稿嘅原意唔係分享老闆娘呢單嘢，想問下你覺唔覺得同事串緊我甩皮甩骨？其實我有少少介意。
投稿讀者：Joy