搵新工真係一日未簽約都唔好太老定，因為有啲公司請人簡直係亂咁嚟，我差少少就年尾失業，行錯一步都險釀成家變。
唔好意思我係由《臥底》開始先follow你個page，唔算得上資深讀者，不過有爬返你嘅舊文，見到有人試過搵到工再遞埋信辭職，然後新公司走嚟反口，所以我都引以為鑑，點知真係畀我遇到，經歷仲要再奇情啲。
嗰份工係我自己搵嘅，面試兩輪之後OK咗，HR打嚟叫我一個月後返工，咁我梗係開心啦，不過老婆聽到之後就好反對，佢覺得我做緊嗰間公司唔係差，既然新Offer唔算特別好，做生不如做熟，畢竟我都39歲喇，揀正年尾轉工唔多唔少有啲冒險。
喺公司面對嘅問題只有自己最清楚，例如唔合作嘅同事係幾咁乞人憎，工作上嘅交接有幾多阻滯等等，呢啲都係我老婆睇唔到嘅，不過我理解老婆嘅諗法，佢擔心我適應唔到新環境，貿貿然轉工可能會得不償失，始終而家間公司做咗5年，總之兩公婆反反覆覆為呢件事嘈過幾次，我唯有接受咗新offer先，但係唔遞信辭職住，一來我有10幾日大假可以扣，二來新公司未同我簽約作實。
幾日之後，新公司HR又打畀我，佢話個Offer 要取消，原因係老細挽留咗本來要走嗰位同事，所以成個position冇咗，我忍唔住喺電話度講：「嘩！我辭咗職咁點算呀？」雖然現實中我係未辭職，但心態上已經諗住轉新工，如果唔係老婆阻一阻，我咪兩頭唔到岸囉！
個HR話佢都唔想，亦都控制唔到，因為係老細吩咐，佢只係跟order做嘢喎，咁都得？
暗暗詛咒呢間公司，又暗暗讚嘆我老婆錯有錯著幫手避過一劫，點知兩日之後，個HR又一次打畀我，今次佢話：「Ivan，個offer而家冇問題喇，因為嗰位同事最後都決定要走，老細希望你照原定下個月返工，價錢同埋benefits同之前所講嘅一樣，咁到時你返工就去咗9樓人事部搵我先。」
我直接答：「我係人嚟㗎小姐，雖然求職，但我唔係一件死物呀！」
香港真係好多痴線公司，你個offer冇問題？我有問題呀！我好似睇住佢老細同個已經遞信嘅員工耍花槍咁，一時又話請，一時又話唔請，一時又話請返，你當我係咩呀？呼之即來，揮之即去呀？莫講話我有份工喺身，問心講句，即使我待業中亦唔會揀呢間公司，點知你哋耍完花槍未？隨時下星期再打嚟話唔請㗎喎，又冇安排到簽約作實，好心就唔好害啲求職者啦！
其實諗返真係險過剃頭，當時老婆已經反對我轉工，如果我唔係有大假喺手，可能一早resign咗，再撞著呢間垃圾公司取消offer，我肯定家變都似，同埋都想講講嗰位HR小姐，雖然老細留人或者取消offer唔係由你make decision，但作為HR係咪完全冇責任呢？有冇為求職者爭取過，又有冇向公司陳述又請又唔請嘅利弊呢？
仲有，點解可以打嚟大安旨意覺得取消offer係天經地義，然後再打返嚟當冇事發生過叫我照原定返工呢？成個世界圍住你間公司轉㗎？
大家follow咗辦公室日報IG未先？兩邊內容係唔同㗎，好畀心機㗎👉👈
阿仔話大個想做經理
https://www.instagram.com/p/CVPqd-QByaP/