上個月去爺爺屋企拜年，有個阿叔問我出嚟做嘢咁耐，而家搵緊幾多？
面對一條又無禮又無腦嘅問題，正常應該一句ban埋去，不過我最錫嘅爺爺喺度，加上當時新年流流，我選擇以較溫和嘅方式回答：「好少，最低工資咋！」
阿叔：「搞錯呀！出嚟做嘢幾年喇喎！仲逗緊最低工資？」
對住啲蛋散，亂咁答就啱㗎喇，因為認真便輸了，畀埋糧單你睇好唔好？
我老豆嗰晚嬲㗎，佢問我做咩要扮矮仔，又話最低工資，又話隨時裁員，唔威吖嘛！上一代通常係咁～～～「我個女鋼琴演奏級喇！」「我個仔個老細好睇得起佢㗎！」總之就報喜不報憂，威咗先講，仔女叻叻即係往父母臉上貼金，雖然唔認同，但我明白。
上星期某一日，老豆忽然問我：「你有冇借錢畀阿叔？」
我：「借咩錢？」
老豆：「你阿叔冇搵你咩？」
我：「冇呀，咩事啫？」
老豆：「搵完我又搵你阿媽借錢，幾個姑姐都收到阿叔電話，連你啲堂兄弟姊妹都搵埋，佢冇問你？」
我：「冇喎真係，今日得啲傳銷電話，冇其他人打嚟。」
老豆：「阿叔問晒成個家族借錢，連你未畢業個堂妹都搵埋，點會冇搵你呀？」
我：「阿叔應該睇我唔起……」未講完我已經忍唔住笑，與此同時老豆個電話又響，原來阿叔問佢借幾千蚊，老豆唔想借又唔知點推。
威唔威？賺幾多？有冇成就？自己知咪夠囉！喺親戚面前攞彩根本冇意思，就算對住唔熟嘅人我都係咁，一來可以免卻好多麻煩，二來睇嘢都會清楚啲㗎！