老細話我6點收工係冇責任感嘅表現

我公司有嚴重嘅OT文化,正確啲嚟講,係老細未離開Office,同事先至會留低OT嘅文化,平時老細只要唔喺度,其他人基本上都會準時收工。

扮又好,真又好,我個人係冇OT嘅習慣,因為我有個仔,而家先得歲幾,一來想多啲時間睇住佢成長,二來都想返去幫吓手,唔使老婆一個人踢晒腳,我返工搵錢都係為頭家啫。

早兩日我做完嘢打卡走,老細應該啱啱想去廁所(斷估佢唔會咁變態特登出嚟捕我啩),佢見我拎住公事包準備離開,即刻叫我入房傾兩句,其實當時已經係6:10,我平時所謂嘅準時走,都唔會話搭正6點奪門而出,因為執下嘢洗下杯都要少少時間。

入到房,老細雖未致於鬧嘅語氣,但就好認真咁問我:「阿Man,你點睇準時收工呢樣嘢?」

冇心理準備佢會咁問,一時間唔知點應機,下意識就重複返佢條問題:「點睇?」

老細:「係呀,我覺得你6點即閃係冇責任感嘅表現。」

我:「但我做晒啲嘢㗎喎。」

老細:「我留意咗一排,見你次次都係準時收工,會唔會係做嘢唔夠上心呀?抑或係工作量未夠飽和?」

我:「喺限期內做好晒啲嘢,我認為係效率嘅表現……」

未等我講完,老細就閘停我,繼續發表佢嘅偉論同質疑:「其實公司希望一班員工有熱誠同埋激情,多啲奉獻,你都想喺度繼續發展㗎嘛,試想像下如果你升職,做大嘅6點即閃,班細又點會勤力呢?」

唔知係咩歪理,我繼續拗落去唔係想同佢鬥氣,而係如果我唔反駁,佢會以為我理虧,會以為我唔OT就係錯:「其實我準時返工,office hour裡面付出100%,然後準時放工,office hour以外就係我嘅個人時間,我理解唔到有咩問題。」

老細:「你返去諗諗我頭先講嘅嘢。」

我:「我走先。」

其實我可以講,同事OT,係因為你喺度,大家先唔敢走,唔信搵日你早啲走,然後7點突擊返office睇下。同埋當其他人office hour聯群結黨落街煲煙煲一個鐘嘅時候,我一直喺自己個位做緊嘢,有啲同事朝早10點先返你又睇唔到,因為老細你自己都係11點先返,不過我冇講到以上嘅說話,因為其他同事同我無仇無怨,我唔希望擺佢哋上枱。

第二日返工,阿head私底下同我講,老細噚晚向佢詐型,話唔鍾意我準時走,我同阿head澄清唔係想佢難做,但真心覺得冇必要做戲,更何況weekday朝九晚六加埋搭車,我喺屋企嘅時間已經好少,做過人父母就會明白,有個歲幾嘅小朋友真係會歸心似箭。

阿head平時份人冇咩,佢冇強迫我,只係話睇得出老細唔多鍾意我,叫我自己走位執生。

當一個人做好本份都唔足夠,坦白講真係有少少洩氣,我唔知老細有幾唔鍾意我,但我鍾意呢個自己。

投稿:阿Man

=====

🥸 唔想OT,會唔會考慮下用呢招
《Office有鬼,陰陽眼同事叫唔好留太夜》
https://hkofficedaily.com/?p=15628

error: