老細好蛇𠺌 唔敢炒人扮執笠

間公司連埋老細得7個人，咁細規模真係有原因，因為有好多零碎嘅事令我覺得老細好「蛇𠺌」，而且工作上嘅嘢亦猶疑不決，咁本來係無傷大雅，間公司係你嘅，生意又係你嘅，準時出糧畀我就得㗎啦！不過啱啱發生咗件事就令我大開眼界。

話說有個新人叫阿Bell，呢個女仔做嘢的確好唔掂，又懶又冇交帶，除咗第一日返工之外基本上日日都遲到，而且經常以不同理由早走，其實阿Bell連試用期都未過，所以真係幾誇張。

老細想炒佢好合理，但竟然唔敢直接向阿Bell講出解僱嘅原因，反而係叫我哋幾個同事夾埋講大話……

「我想話公司生意差，嚟緊幾個月會執笠，跟住就話逐步解散員工，因為阿Bell最新，所以佢係第一個，如果阿Bell問起你哋就話係啦！」

唔使我出聲，另一位同事已經質疑：「搞咩呀？你想炒佢咪直接同佢講囉！又點樣執笠呀？」

「而家啲後生好麻煩㗎！郁下擺上網唱衰公司，咁我話就快執笠咪穩陣囉！大家都冇得做，啱唔啱先？起碼佢唔會覺得公司針對佢吖嘛！」

我都忍唔住要同老細講：「唔好痴線啦！要所有人做場戲扮公司執笠，炒人嘅道理本身喺你度，而家講大話咪變咗你有問題囉！遲啲你請人又登招聘廣告，阿Bell都有機會見到㗎，搞咁多嘢做咩啫？」

「咁到時咪話公司度過咗困境，暫時唔執住囉！」

結果老細真係用呢個原因辭退阿Bell，人哋都冇扭扭擰擰，當日已經執嘢走啦！阿Bell仲問我哋嚟緊有咩打算，大家要扮嘢話未知，真係多嚿魚！炒個人都驚，你點做老細呀？唔怪得間公司做極唔大啦！