每個人身邊都有個燈神，亦梗會有個搭沉船嘅朋友或同事。
有個同事唔知係咪畀人落咗降頭？發生喺佢身上嘅經典事蹟實在太多，成班人出去食lunch，佢叫嘅嘢食唔係漏單就係嚟錯。
如果佢同我哋叫同一個餐呢？咁咪集體漏單同集體嚟錯囉，定律嚟㗎！
呢位同事仲好鍾意買波買馬買六合彩，試過買咗嗰隻馬發生騎師墮馬意外，又試過同幾個部門嘅人分別夾咗幾張六合彩，關佢事嘅number加加埋埋有成30幾個，但係最終開出嚟嘅中獎號碼，竟然咁多張飛都冇個中，必須要再強調，唔係差少少或者一張飛中得一兩個，係咁多張飛都冇一個中獎號碼出現！
有個口痕友曾經講笑：「如果知佢嗰期同其他人買邊堆number，我哋買淨低嗰啲應該好快發達，at least可以中二三獎。」
買波方面就更邪，曼聯之前換咗蘇斯克查做領隊，一度造出英超6連勝紀錄，佢呢6場波全部冇買，然後見個勢咁好就跟紅頂白走去買曼聯win，結果嗰場曼聯和波，英超連勝走勢告終。
早排佢喺WhatsApp group話自己買咗某場波嘅「入球大」（一般情況之下兩隊加埋入3球就叫大，例如2：1、3：0、2：2或者更大比數），當時呢場比賽踢咗10分鐘已經2：0，仲有大嗱嗱80分鐘先踢完，佢喺WhatsApp group入面係咁Yes！Yes！Yes！，點知場波之後再冇入球，90分鐘踢完都係維持2：0嘅賽果，即係開入球細。
無啦啦講呢啲做乜？冇呀，想話畀大家知，今晚凌晨歐聯決賽由利物浦對熱刺，佢話熱刺sure win，已經去咗投注站用行動支持。
報告完畢，大家切勿沉迷賭博，我比較想知熱刺會唔會喺燈神「眷顧」之下逃出生天。