「去我公司做啦，真係唔鍾意咪做埋新年再搵囉，二月頭已經過年啦！」
「我唔想麻煩你吖嘛！好似夾硬開個位請我咁。」
極力邀請我去佢公司做嘅人係Karen，我哋識咗15年，由同事變成舊同事，由舊同事變成最好嘅朋友，大家一齊由廿幾歲變成而家三十到尾，我睇住佢結婚，做佢伴娘，再睇住佢生小朋友，做埋佢個女嘅契媽，有時覺得親生家姐都冇我同Karen咁親。
後來，我亦陪伴Karen度過人生最難捱嘅日子，佢結婚3年後發現老公出軌，當時佢生完BB冇耐，係出面個女人直接打畀Karen攤牌，仲send咗好多同佢老公嘅床照過嚟，所以無花無假，擺明係要拆散Karen頭家，至於嗰個女人點解要咁做，可能係動咗真情，亦可能係好勝，呢個世界真係有種女人嘅「嗜好」係搞有婦之夫，係咪特別有成功感？不過已經唔重要，出軌就係出軌，仲要鐵證如山。
嗰陣Karen仲坐緊月，你想唔想像到係幾無助？佢Call咗我去幫手執嘢，3年婚姻同床共枕，Karen都只不過執咗一個行李箱同埋一個俗稱「走佬袋」嘅Hand Carry，用咗短短個幾鐘就執好，連結婚戒指都冇拎，我幫手拎行李，佢抱住個女，就咁落街坐的士去酒店暫住。
Karen父母唔喺香港，又冇兄弟姊妹，所以嗰段日子佢係一個人喺酒店照顧BB，雖然我經常去幫手，但最辛苦嘅時刻都係Karen獨自面對。
好多人勸Karen唔好咁硬頸，包括佢嘅父母同埋親戚，內容來來去去都係：「個女咁細個，唔好搞咁多嘢啦！」不過Karen冇辦法再接受呢個男人，佢開始重投職場接freelance維生，等到個女再大啲可以去託兒所，Karen另外又搵咗啲半日嘅part time，嗰幾年我睇住呢位好朋友不斷奮鬥，到後來搵長工，追星趕月係咁做嘢，開埋自己嘅細公司創業，愈做愈好，愈做愈穩定。
呢10年裡面，Karen為個女做咗最佳嘅示範，佢話就算曾經跌落低谷，如果可以乾脆斬纜，堅定咁一刀切，最終都可以憑自己嘅努力爬返出嚟，佢真係做得到，否則今時今日到我失業，Karen都唔會極力邀請我去佢公司做，佢希望我可以度過年關。
最終我冇接受呢個Offer，因為想搵多一陣先，其實Karen除咗離婚初期一個人湊住個女要我幫忙之外，大部份時間都係佢幫我比較多，唔係錢銀上，因為我哋從來唔講錢，講錢會傷感情，佢係喺感情方面畀咗我好多意見，過來人睇嘢係透徹啲。
記得Karen講過，唔好以為搵個樣子平庸，甚至係醜樣嘅男人就會有安全感，佢老公就係一個人板，唔止其貌不揚，仲要矮過佢，結果係點吖。
Karen話，有時醜男由於長相平庸，好少有女仔睇得上眼，所以一旦受到誘惑，自制能力反而唔高，怕執輸自然有食唔食罪大惡極，不過佢都補充一句，總有人係例外，不能以偏概全，只係我有時望下身邊啲男性，又好似有道理喎，邊個話靚仔一定冇安全感，樣衰就一定唔會去滾。
講返正經嘢，作為朋友，見到Karen可以喺谷底反彈，仲親身為個女作出最佳示範，我係非常替佢開心，佢而家愈嚟愈sharp，有事業有自信嘅人的確有獨特嘅光芒，呢樣嘢男女都係一樣，希望我盡快搵到新工作，可以用Karen作為一個指標同榜樣。