我返工嗰度都幾偏僻，10分鐘內可以行到嘅餐廳有3間，兩間係地舖茶記，劣食指數爆燈，仲有間喺工廠大廈裡面嘅食堂叫好啲，但都係頹到不堪。
先講下食堂，所有小菜無味，唔知以為係主打健康低鹽餐單定中咗肺炎冇味覺，叫餐蛋飯啲餐肉都可以又爛又崩角，仲要得勁細塊，好似喺地下執返上嚟咁，唯一可取係有美極任用，好多時要美極撈飯先啃得落，但有次同事食麵食食下發現五毫子銀仔，從此就冇再去喇，唔肯定係水吧跌落去定係風水嘢啦，五毫子湯底你聽過未？
兩間地舖茶記就前無古人，後無來者，腸仔同火腿都可以無味，完全唔知食咗啲乜，究竟點樣將呢啲加工食物由超濃味整到無味呢？叫雞翼雞扒之類例牌唔熟，豬扒薄切你有冇見過？夾起佢係透光既，超佩服廚房嘅刀工，定係唔知邊度入到批咁出色嘅豬扒，叫滑蛋蝦仁個蝦仁冇味就預咗，估佢唔到個蛋會好似生粉水溝稀咁，簡直鬼斧神功，啲滑蛋直頭似精……算喇，講其他嘢，乾炒牛河食到成口油，食完會好唔舒服，幾個同事都係咁講，甜嘅星洲米你食過未？或者係fusion菜我哋唔識啦！
試過叫叉燒，諗住穩陣吖嘛，間餐廳夠膽死成嚿叉燒冇切就咁撻落碟飯度，可唔可以唔好咁呀！用把刀切幾片啫！
未計飲品，無論你點樣叫少甜都好，仍然會覺得好甜，換完都一樣，唔記得叫少甜仲大鑊，包你轉頭即刻有糖尿病，睇得出個水吧一係hea做一係冇經驗，茶膽唔掂其實你點沖都唔會好飲，其實兩間茶記應該冇關係，亦都唔同老闆，但啲食物同飲品竟然難食到不相伯仲，欽敬欽敬！
唔開名係因為之前你有個post，講個員工上網唱衰間餐廳，我唔想做呢個角色，畢竟食過嘅人或者喺同一區返工嘅人一定會知，其他區亦唔會入嚟食。
睇到呢度你應該會問，而家外賣App咁盛行，唔識上網order㗎？一定要食附近啲餿水咩？唔知我哋呢區搞乜鬼，叫10次外賣有7次出事，而且係頻密發生：
飲品倒瀉得返一半；
送漏咗嘢飲；
送漏咗個飯；
外賣網顯示外送員已經拎咗食物，但係隔成個鐘都未到，打去餐廳問，職員話根本冇人嚟攞過，不過系統就轉為「已取，運送中」嘅狀態；（有冇人試過？）
系統不斷delay運送時間，啲飯擺咗成粒鐘都冇人去拎。
公道講句，以上有啲失誤未必關外送員事，例如打包漏咗食物就一定關餐廳事，有一次超級離譜，同事叫吉列豬扒飯，嚟到可以冇豬扒，打開得白飯（有汁㗎喎），成件事係幾咁震撼！至於送嚟送去都未送到，我大膽推測係公司太隔涉，真係唔受外送員歡迎，以上嘅連環不幸事件係keep住發生，所以同事叫外賣都叫到灰，每次都好似賭大細估有咩事發生，久而久之就唔敢叫喇。
換言之我哋得返兩個選擇，一係再出去遠啲食，一係硬食附近幾間餿水餐廳 ，其實仲有其他選擇嘅，例如帶飯、食波仔飯、食杯麵，問題係個個屋企都有煮飯咩？加上食lunch真係唔想留喺office，結果咪去遠啲食囉，不過lunch hour又得一個鐘喎，問你死未？
早排做嘢好辛苦，同事決定要去遠啲食好啲，所以遲咗返到office搞到老細詐型，後來我哋同佢解釋餿水餐廳實在太恐怖，冇辦法之下要駁車出去食，佢死都唔信，咁梗係啦老細，你自己日日返點幾兩點，喺出面食晒飯先返公司，自然唔知民間疾苦。
為咗令佢心服口服，我哋誠意邀請老細同大家食一次餿水，一坐低佢已經好唔聚財，衛生情況唔挑剔喇，食茶記唔通要五星級酒店環境呀？但最難頂係餐廳裡面有一陣味，相信係通風系統問題，你食完會發覺成身有極強油煙味，然後老細叫牛扒飯，佢話完全咬唔開，啲汁例牌溝生粉feel，叫熱飲唔知點解用凍飲杯，但份量又得一半，茶膽唔好提喇，總之好澀，老細另外叫咗碟雞翼，隻隻都好似小兒麻痺咁，大約手指尾咁大啦，你以為係單骨雞翼咩，喂sorry呀，佢話係雞中翼嚟㗎！仲有，茶記抹枱塊布先究極，成陣酸醙味，佢唔抹枱反而好啲。
不過又唔好係咁投訴，因為餿水餐廳總算發揮到佢嘅存在價值，老細試完之後終於明白同事有幾慘，公司從此有兩個鐘lunch hour，自己睇住時間唔好太過份就得，大家嘅命運得以改寫，同埋我都冇咁嘴刁喇，基本上食過餿水，出去再食其他嘢都會覺得好正，我而家永遠懷住感恩嘅心食飯，hallelujah！