我阿媽做緊一份contract工，叫咗佢好多次唔好做，甚至使出銀彈政策－－－不斷加家用，希望佢可以喺屋企休息下，但佢每次都答：「如果唔返工我會好易瓜老襯㗎，一定要有啲同事、朋友，出去郁動下，日日喺屋企好易病㗎！」
呢個原因佢已經講咗幾年，係咪每個老人家都係咁呢？呢個理論又有冇根據㗎？
由於係contract工嘅緣故，公司準備續新約之前，要佢去醫生度驗身，證明冇乜大毛病，點知個醫生check到佢尿液有問題，照寫落份報告上面，噚晚我哋三母子去打邊爐，阿媽就怨個醫生喇，因為擔心公司見到之後唔續約，細佬聽到之後好大反應：
「你仲怪個醫生呀？佢為你好咋，都要如實寫出嚟唔可以做假，你續多半年約賺到幾多錢呀？條命仔緊要定錢緊要呀？」
阿媽：「做多半年加加埋埋有8萬蚊左右㗎！」
細佬：「你真係走火入魔，8萬蚊緊要得過健康？8萬蚊叫哥哥畀你都得啦！」
然後我阿媽冇出聲，坦白講真係第一次見細佬咁兇狠，平時佢嘻皮笑臉冇厘認真，呢幾分鐘覺得佢好型好Man。
返到屋企之後，我一直諗點樣叫阿媽唔好續約，同時又諗，點解係「8萬蚊叫哥哥畀你都得啦！」
咁你呢細佬？