恭喜我朋友終於去到日本工作喇，搞埋visa，可以圓夢，雖然喺日本返工可能慘過香港（都應該唔係可能），但呢個係佢心願，趁後生咪闖下囉！講真有咩事最多返嚟，個決定啱又好錯又好，都係同自己有個交代啫。
佢一直都好鍾意日本文化，我識佢嗰陣未讀日文，然後睇住佢N4、N3、N2咁上，期間介紹過啲喺香港嘅日本公司畀佢，佢個心好想試，不過又怕自己未準備好，N3嗰陣話想讀到N2先，N2嗰陣又想讀到N1先，問題係機會唔等人，卒之有一次我問佢：「你讀完N1，係咪會講得好過日本人？」
「梗係冇可能啦！一聽口音就知。」
我：「咪係囉！我有朋友N1，好多日本friend，講日文多過講廣東話，但佢喺日本做嘢都會畀老細嫌講得唔好，仲叫佢再進修。」
「我都知，但擔心未準備好，想再操下先。」
我：「咩叫操下先？有機會都唔試，你想十全十美先去做？點為之完美，3年後你肯定完美？」
「其實我驚畀人打沉，連信心都冇埋，跟住覺得自己讀咁多年日文係浪費。」
我：「你唔踏出呢一步先係真正浪費，如果人哋今次唔請，都可以檢討下衰咩，下次再有機會去interview咪改善囉，好難100％準備好㗎！今次呢間日本公司請人，做得好有機會過東京head office，雖然我唔知個客係咪吹水，但我見佢哋都幾有規模，試下啦！」
最後佢有試，請咗，一做就兩年，今年公司終於派佢去東京head office，總算成就解鎖，臨出發前我哋食咗餐飯，又重提返呢段往事，佢話多謝我鼓勵，我話多謝《飲食男女》套戲啦！當時都係跟一句對白學：人生唔係煮一餐飯，冇可能等到萬事俱備先落鑊。
無數次我以為自己準備得好好，但係做出嚟嘅嘢都不似預期，工作係咁，感情又係咁，好多時機關算盡，都唔一定有理想嘅結果，反而輕裝上陣，又會無心插柳柳成蔭。
一直想轉工？Send CV啦！有夢想要追？得唔得都畀自己交代啦！躍躍欲試一段新戀情？放手追尋幸福囉！
機會唔等人，人生真係唔似煮飯，冇可能等到萬事俱備先落鑊。