《診所低能奇觀》等人到

有日一位小姐嚟到診所。

佢行埋嚟登記處問:「醫生喺唔喺度?」

我:「喺呀,而家有醫生睇啦,你俾身分證我登記先呀」

佢:「係咪即刻有得睇?」

我:「係呀,下個就到你啦」

佢:「平時冇人睇嘅咩?」

我:「有~」

你都算係人呀可?

佢望望四周:「係呢個毛聞冇人呀?」

我:「咁啱啫」

多人又話要等得耐,唔駛等又話冇人。

佢:「係咪你醫生唔ok呀?我唔想嘥錢喎」

你想我點答你啫,我收得醫生人工…

我:「真係咁啱冇人啫」

佢:「你俾個紀錄我睇呀」

我:「咩紀錄呀?」

佢:「今日嘅病人紀錄呀」

我:「呢啲私隱嚟喎,唔可以俾人睇啊」

佢:「咪係囉,你連呢啲都俾唔到proof我」

咁你扯啦,你喺度磨乜啫。

我:「如果小姐你唔係而家要睇醫生要登記嘅,我冇其他嘢幫到你啦」

佢行咗去坐低。

隔咗一陣佢講:「see?我坐咗喺度咁耐都冇人入嚟㗎」

你係咪好得閒啫?搵啲有意義嘅嘢做下好冇?

過咗陣,有人推門入診所。

小姐彈起身,即刻衝埋嚟登記處,掉咗張身分證落我面前,大聲同我講:「我登記先㗎!」

…你做乜啫。

推門入嚟嘅係化驗所派件姨姨…姨姨放低報告俾我簽收後就離開咗診所。

小姐望見咁嘅情況問我:「咩人嚟㗎?」

我整理緊啲報告擺埋一邊:「送報告嚟嘅」

佢:「唔係嚟睇醫生㗎?」

我:「佢唔係呀,不過你係,你等等,我而家登記」

佢超住我。

我開心登記,成功收症。


👉🏻《診所低能奇觀》「我都唔覺有問題」
https://hkofficedaily.com/?p=18691

我叫珍寶豬,係一個診所助護,只係一個無能無專業資格無牌照的大嬸。做過晒港九新界中西醫診所,見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事,但請勿公開任何病人個人資料或病人相片。看此PAGE時請勿對號入座,信則有,不信則無。

error: