發生喺我Headhunt舊同事身上，佢每晚放工都會搭小巴，但係車少人多，所以一般情況下要排十幾分鐘甚至半個鐘先上到車，有班Sales好鍾意趁呢個時候走去sell排緊隊嘅乘客，因為你走唔到，只能無奈企定定聽佢哋講吖嘛。
每晚都係嗰班Sales，舊同事話有時就算講緊電話，佢哋都會打斷你走嚟sell嘢，一直覺得好困擾，但係舊同事突然好開心咁同我分享：「喂，我有隻Call Centre嘅CS，一個星期搵到3個人，全部中晒！」
我：「咁勁？好多人唔肯做Call Centre㗎喎，CS好受氣。」
「咁就要睇下對方之前返咩工喇，我哋公司班Headhunt好鍾意搵空姐去做CS㗎嘛，咁就梗係難啦，但係我上星期等緊小巴嗰陣，有個女仔行埋嚟話阻我一分鐘，仲強調唔係sell嘢，淨係想做份問卷喎，真係當我低能咩，我咪畀佢問埋先囉，然後個女仔就問我有冇食煙嘅習慣。」
我：「慣常技倆啦，十幾年嚟都係呢種套路。」
「係呀，有句對白好似黑社會㗎～～～你屋企人咁幸福，你都唔想佢哋有事啩！哈哈哈哈，佢哋嘅意思係話買咗保險之後，屋企人有晒保障，咁就自然會平安啦！佢哋做問卷嗰陣唔sell你，不過就要你留電話同名，拎返公司再畀其他經紀打嚟sell，呢招真係十幾年都冇變。」
我：「其實保險係有需要買嘅，最緊要係同可靠嘅經紀買，保險本身冇問題，係某啲人嘅手法有問題啫，咁最後點？」
「最後我直接同個女仔講，保險呢，我就唔會喺街同唔識嘅人買，係買都同身邊信得過嘅保險friend買，但我有份工介紹，叫個女仔留返電話畀我。」
我：「溝女定真係有工介紹呀？」
「我咪介紹Call Centre CS份工畀佢囉，我話喺街sell嘢套人資料，正常都唔會鍾意呢份工啦，咁點解唔正正經經搵過另一份呢？何況大熱天時，室內有冷氣嘆嘅工唔會爽啲咩？小巴站熱到仆街，當街做問卷咁辛苦，人工又唔係高。」
我：「佢真係畀電話你呀？」
「畀咗呀，請埋添！佢仲介紹另一個同事我識，都請埋，前兩日又有個男仔趁我等小巴走嚟做問卷，再撬囉！不過呢次驚動到佢哋個阿頭，傾傾下有條西裝友行埋嚟問咩事，問我點解叫佢同事留電話？我話你哋拎我電話就得，我拎返你哋電話唔得咁惡？西裝友話佢哋做緊嘢點同呢，我話自己做獵頭，撬人轉工都係做緊嘢，大家各有各做咋喎！」
最後舊同事真係撬埋個男仔，而家佢搭小巴排隊冇人再走嚟做問卷，因為西裝友阿頭離遠見到我舊同事，就會叫佢班sales唔好行過去。
我：「你造福人群喎，排你前後左右嘅乘客都唔使畀人煩住做問卷。」
「我諗住今晚搭小巴擒賊先擒王，一陣直接sell個西裝友阿頭做Call Centre CS，再叫佢帶晒成條Team過嚟，返Centre有得嘆冷氣，舒服過喺小巴站吸廢氣啦！」
人哋Sell你做份問卷啫，你就將人哋條Team連根拔起，你好唔好意思呀？
＝＝＝＝
今時今日睇返呢段舊文，感受更深。
離開一個工作崗位嘅失落，有時並非單純唔捨得份糧，坦白講跳出去隨時搵得仲多，最難過只係要告別熟悉嘅人同環境。
https://hkofficedaily.com/?p=12567