第三者自然會有報應─情侶座

圍內中學同學有對拖友,改佢哋個名做Crystal同Barry啦!某次成班舊同學飯聚,傾緊點樣幫以前一個老師搞榮休宴,當晚Crystal個男朋友Barry冇出嚟,大家傾到興高采烈嘅時候,Crystal電話響,我哋聽到佢講:「你打畀我做咩?你有咗佢BB就打返畀佢,定係想問我攞錢落仔?咁你可以慳返啖氣,如果你想叫我同Barry分手,呢樣都唔關你事,係我同佢之間嘅事。」

成班同學呆晒唔識畀反應,不過當時人反而好淡定,睇得出佢唔開心同埋面色一沉,只係冇人敢問任何嘢,頂多都係夾住Crystal坐嗰兩個女仔分別拍下佢,簡單問句:「冇事吖嘛!」然後Crystal話冇嘢,繼續傾埋點樣幫老師搞榮休。

後來聽返Crystal講,佢冇再接Barry電話,一直唔肯見面,相隔唔夠兩個星期,我哋成班舊同學第二次出嚟傾榮休單嘢,呢次再多咗幾個第一次冇出嚟嘅同學,仲有兩個以前教我哋嘅Miss,唔知邊個通水畀Barry,佢竟然出現兼扮到若無其事,有個Miss上次唔喺現場,唔知頭唔知路走去問:「你呢Barry?幾時同Crystal結婚呀?讀書拍到而家喇喎,之前仲見你哋post旅行相,請飲要派帖畀我呀!」

Barry打蛇隨棍上:「等Crystal應承咋,佢肯嫁,我肯娶。」然後Crystal望住Barry講咗句:「你講定我講?」Barry迴避冇答,Crystal隨即將所有嘢講晒出嚟,包括個第三者近排點樣騷擾佢,同埋Barry原來同嗰個女仔已經喺埋一齊幾年,對方過去幾日仲cap埋唔少床照畀Crystal睇,又話上Barry屋企嘅時候,拎咗Crystal支牙刷去浸廁所水……

我哋有幾個同學都好嬲,當場就鬧爆Barry同埋叫佢走,然後聽返Crystal講,第一次飯聚聽到第三者個電話嗰陣,佢唔係好似我哋所見咁冷靜,只係坐喺兩個同學中間起唔到身出去,加上知道成班舊同學好難先夾到時間出嚟傾嘢,嗰一刻佢情緒崩潰都於事無補。Crystal,佩服之餘,都辛苦你喇。

呢件事已經係幾年前,Crystal亦同咗另外一個男仔一齊,佢哋好幸福,而家個男朋友好錫佢。至於Barry,有一個同佢較熟嘅舊同學話,當時做第三者個女仔用BB迫佢結婚,婚後兩公婆感情甚差,Barry周不時要搵人出嚟飲悶酒訴苦,最新一粒花生係懷疑個BB唔係佢親生。

男又好,女又好,坦白講你唔使詛咒第三者同埋狗男女,因為呢啲人嘅性格同行為本身就好易出事,咩都唔使做,已經好快會見到報應。

error: