有冇發覺市道唔好，但你份工又唔知點解忙過之前？
講咗少少數據先，利益申報，唔係廣告，純粹係想打工仔有更多資訊，有助清晰返個搵工方向，根據JobsDB網站內嘅搜尋數據顯示，今年首季比上年首季多咗+184%有關「兼職」嘅搜尋量，簡單啲講，即係好多好多人而家搵緊兼職。
其實唔睇數據都聞到陣味，近呢一個月多咗人問我有冇freelance介紹，我有個空姐朋友因為暫時都冇得飛，上星期亦去咗見工，一份時薪$60嘅part time，不過我覺得嗰份工有伏味，呢個遲啲再另開一篇稿，順便想大家提防下求職陷阱。
好多人而家走晒出嚟搵part time、freelance、臨時工同埋合約工嘅心態唔難理解，因為目前社會上好多行業同埋公司都陸續出現裁員嘅情況，亦有好多行緊停薪留職，仲有一種係照出底薪留職，但只限底薪，例如我個空姐朋友，當然亦有一批candidate係未搵到正職，所以part time同temp嘅工作都殺住先，始終兼職方便甩身，之後重投正職都容易啲。
我知道fb page同app不嬲都有一啲炒散招聘群組，當中以飲食行業居多，喺疫情同埋限聚令影響下，食肆生意亦大減，冇工開，唔需要咁多人，炒開散嘅朋友亦一齊出埋去搵其他兼職，從而變成大混戰局面，比上年首季多咗184%有關「兼職」嘅搜尋量絕對有跡可尋。
問題嚟喇，多咗人搵短期工作職位，但係啲公司就同一時間cut緊part time同埋freelance，以我一位做media嘅朋友為例，老細告知佢廣告急跌，之前做訪問會搵出面嘅人影相同拍片剪片，而家全部唔用街外人，cut晒budget，我呢位任職編輯嘅朋友本來只係負責文案，而家要孭埋機出去拍，返嚟就同其他同事edit埋條片，工作量大增。冰山一角只係例子，好多公司都係行緊同樣方針，同時採取自然流失，有人走就唔再請人，所以唔少打工仔都會發現個市明明唔好，但又唔知點解忙到hihi。
急還急，搵part time還搵part time，大家都要睇清楚係咩公司同埋乜嘢類型嘅工作，亂世就最多妖獸，好記得以前有個求職者同我哭訴唔做之後要分期還錢畀公司，我自己以前都曾經險墮倫敦金騙局，各位搵工嘅時候不妨search多啲資料，問下身邊朋友意見。
＝＝＝＝＝＝＝＝＝＝＝＝＝
今年首季比去年首季多+184%有關「兼職」的搜尋量
全職
每個職位的平均申請數目升幅：+58%
兼職
每個職位的平均申請數目升幅：+146%
Freelance
每個職位的平均申請數目升幅：+31%
臨時工
每個職位的平均申請數目升幅：+101%
合約
每個職位的平均申請數目升幅：+62%
《Source：JobsDB》