下屬態度突變:屋企有兩層樓,你擔心我啲乜?

「擔咩心呀?我屋企有兩層樓,我係獨仔,你究竟擔心我啲乜嘢?」呢番說話係一個下屬同我講,正唔正?

我公司全部同事都好後生,原因唔係想有活力,只係老細覺得fresh grad人工唔高,所以偏好請職場新鮮人,而作為上司嘅我都不過係31歲,幸運地同班後生仔相處唔會出現代溝。

一直以嚟大家都work得好開心,工作時工作,嬉戲時嬉戲,但係早排有個下屬好唔聽話,我稱佢為Alvin(化名),佢唔知做咩忽然係咁遲到,有時成朝唔見人,message唔覆,電話唔聽,然後before 或者after lunch先打返嚟話唔知醒,呢種情況近月開始頻密。

作為上司,我有捉佢入房傾下發生咩事,又未去到照肺,因為呢間公司嘅工作氣氛不嬲好愉快,更何況佢唔知醒當sick leave請假,你又真係吹佢唔漲,只係搞搞下其他同事開始有不滿,因為好多時要執Alvin手尾,結果我又再捉住佢私下傾多次。

「點呀大哥?最近係咁遲到喎,噚日唔返工又中午先講。」我哋平時嘅溝通方式就係咁,真係冇敦起個上司款㗎。

Alvin:「前晚同班friend去飲嘢吖嘛,第二日咪唔知醒囉!」

「認真喇,係咪有咩事啫,講嚟聽下啦!」

Alvin:「有咩事呀?冇事喎!」

「班同事詐型喇,有時你遲返同請假,佢哋執手尾好辛苦㗎,無謂要我難做啦!」

Alvin:「咁一係我唔做囉,唔係發晦氣呀,不過呢排都攰攰地,想唞下先。」

「我唔係要炒你,但你知我一直當你哋係細佬妹,最近突然工作態度變晒,老老實實係咪公司有咩令你唔滿意先,有咩唔怕講。」

Alvin:「堅冇喎,係我自己想唞下咋,唔關公司事,一陣間我請食tea啦,之前要佢哋執手尾又真係唔好意思嘅。」

彼此之間嘅對話,Alvin似我上司多啲。

「你仲未答我喎,搞咩成個人唔同晒啫,擔心你㗎,梗有啲事發生咗。」

Alvin:「擔咩心呀?我屋企有兩層樓,我係獨仔,你究竟擔心我啲乜嘢?」呢句,好有霸氣。

問多兩問Alvin話我知,原來早排有個親戚急病過咗身,跟住Alvin阿媽突然變得好感觸,覺得做人好化學,結果就畀晒online banking嘅login同password出嚟,仲有樓宇買賣合約、一堆鎖喺櫃桶嘅金飾、保單,千叮萬囑Alvin幫佢睇實,好似交代身後事咁。

「咁又點?你今日先知屋企有兩層樓咩?之前你工作態度都唔係咁。」

Alvin:「我係一早知屋企有兩層樓,阿媽仲講過另一層第日收返畀我結婚用,但我真係今時今日先知佢個銀行戶口有咁多錢,7位數挨近尾,因為阿爸喺我細細個嗰陣已經走咗,阿媽一直超慳家,我成日以為佢要供兩層樓所以勒緊褲頭,點知原來一早供完,總之我login去阿媽個online banking之後,見到佢啲存款都呆咗,我覺得自己唔使再咁辛苦啫。」


L


同埋你喺度返工有幾辛苦呀?

雖然我係人哋阿頭,不過……我銀行戶口真係冇7位數,至於樓,莫講話兩層啦,真係半層都冇,之前睇你個page出現過一句說話好啱~~~條條大路通羅馬,但係有啲人一出世已經住喺羅馬。

「OkOk,當你而家知道阿媽好有錢,咁我同班同事無辜㗎嘛,幫幫手啦,準時返工,唔好no show得唔得?」

Alvin:「得啦,識做。」

我以為佢講「得啦,識做」係指第二日開始會準時返工,點知佢個「得啦,識做」原來係指辭職,最後嗰個月仲遲得勁咗,但我又可以點呢,辭咗職嘅人就最惡,大把錢又辭咗職嘅人就更加惡。

只係我有個疑問,Alvin阿媽畀晒啲online banking嘅login佢啫,又唔係畀晒戶口啲錢佢,Alvin得嗰廿幾歲仔,斷估佢阿媽唔會老得去邊,除非你攤大手板攞啫,否則大吉利是講句,啲身家同遺產有排都未到手啦,知道屋企好有錢之後就冇晒返工動力,之後嘅日子點過呀?

算啦!打打下都覺得自己好葡萄,換轉係我突然知道老豆老母收埋大把錢,可能都會同佢一樣。

投稿讀者:Sidney

error: