認識我男朋友嘅時候，我哋喺同一間公司做嘢，呢份工係客戶服務主任，當時我覺得佢好charm，可能係對得多日久生情，我哋喺好自然嘅情況下開始咗，半年之後佢決定轉工，我好支持，雖然佢下一站係去Salon做俗稱嘅「洗頭仔」。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
唔係輕視或貶低「洗頭仔」，重點唔係份工，係我男朋友，當時佢都33歲，會唔會有少少……超齡？同埋男友之前都唔係做開呢行，所以唔止轉工咁簡單，而係轉行。
我：「洗頭學師仔幾錢人工？你冇經驗真係請你咩？我見salon都係請妹妹仔洗頭，都有男仔洗頭，但都好細個。」
「幾千蚊人工㗎咋！呢間髮型屋我幫襯咗好多年，同個老闆，仲有師傳都好熟㗎，有時仲會同佢哋食飯打邊爐，因為我一直想做髮型師，咁咪求佢哋畀我試下囉，就係冇經驗先至由洗頭仔做起，呢段期間師傳會教我點剪，髮型師嘅必經階段，到時就唔止幾千蚊人工。」
既然佢有自己嘅興趣，目標，同埋方向，咁就ok啦！有時佢會叫我喺salon閂門後去剪頭髮，當係畀佢試，我去過一兩次，又真係見到男友同佢班salon同事相處幾融洽。
我：「幾時正式做師傅呀？使唔使叫晒啲朋友落嚟搵你剪，撐你吖嘛！」
「我諗住自己開間細細哋嘅速剪，而家好興㗎，唔洗唔電唔染，十零廿分鐘搞掂，其實仲好搵，舖頭又唔需要好大間。」
我：「下！你呢一年先至學師，咁快開舖頭？會唔會太快呀？」
「去得速剪一般係兩類人，一類係修少少，例如男仔想修下『的水』，手板眼見功夫，另一類就係電車男嗰種柒姑碌，佢哋求剪短㗎咋，好容易。」
開速剪係咪真係咁易？我真係唔知，我男朋友其實都唔知，因為佢最終都冇開，反而辭咗salon份工，走咗去學廚…..
男朋友話一直都想做廚師，原因係好迷戀整個工序，例如煮一道菜，會有人幫手「執碼」，然後廚師一落鑊就炒得。
我：「咩係執碼？」
「即係預備食材呀，例如廚師要整乾炒牛河，咁就要有條學師仔或者幫廚，備好晒河粉、牛肉、豆芽，一兜兜咁樣擺好晒，方便廚師逐樣逐樣倒落鑊炒，你唔覺得成件事好型㗎咩？好似啲醫生做手術，旁邊啲護士遞手術刀過嚟，我而家學執碼先，遲啲就可以擔大旗做廚師。」
型唔型我就唔敢講，淨係覺得男朋友好跳，之前話想做髮型師，而家又話想做廚師，相差太遠喇啩！
後來我男朋友又話想開餐廳，又話識得人去咗英國Manchester嘅唐人街做中菜大廚，人工好高，仲話他朝有日要成為亞洲區擁有最多米芝蓮星星嘅廚師。
有目標係好事，不過按部就班啦，我相信每個開餐廳嘅人，每個離鄉別井去英國唐人街做大廚嘅人，仲有取得米芝蓮銜頭嘅人，背後都付出過好多，只係個個都會見到風光一面，唔知道捱出嚟條路有幾艱難啫！
然後有次男友上我屋企拜年，第一次見家長，事前我已經同阿媽講過男友做廚師，點知當我阿媽撩佢傾計，問佢煮咩最拿手嘅時候，男友竟然咁答：「我啱啱唔做喇，嚟緊會揸車。」
嗰陣係連我都唔知，究竟佢幾時又放棄咗做廚師？
我：「揸咩車？」
「揸Uber，聽朋友講幾好搵，同埋呢份工好過癮㗎喎，每日都可以見到好多人，有好多故事，嗰種新鮮感真係會令人日日都想開工，同啲客傾下計，時間好快過，人工都唔少㗎！肯定好過我去做學廚先！」
男友講到興高采烈，但佢冇留意到我屋企人面色變晒。唔係睇唔起佢揸Uber，而係我哋都覺得佢工作好唔穩定，而且係冇持續性，最大問題係睇得所有嘢都好簡單。
屋企人冇同我傾呢個問題，但作為佢哋個女，我點會唔知阿爸阿媽諗乜。
我開始好認真咁樣同男友討論將來，再唔係一味盲目支持佢，畢竟拍咗幾年拖，我同佢年紀都愈嚟愈大，我自己諗嘢同埋睇嘢有隨住日子同經歷而成熟，但係男友呢？佢似乎冇。
揸咗幾個月Uber，男友同我講有時會冇單，懷疑個系統壞咗……然後佢話去學調酒，要做Bartender!
「其實喺酒吧做嘢先可以見到最多人，我有friend做緊，仲話成日有啲女仔飲醉酒會投懷送抱，不過你放心呀，我絕對唔會亂嚟，打算上完個堂，學咗基本功，跟住就去我個friend間bar做，佢話可以介紹喎！」
我：「最擔心唔係你識女仔，我係擔心你前途，我哋年紀真係唔細喇，你係咪要不斷轉工轉到40歲？同埋你一直轉行，全部工作都唔關事，咁樣長遠係冇幫助，你覺唔覺得自己做每樣嘢都係三分鐘熱度？」
男友話唔覺，佢覺得做呢啲工好好玩，就算髮型師、廚師、司機、Bartender，全部都係好funny嘅工作，佢鍾意咁樣。
最終，我哋分咗手，咁當然仲夾雜其他原因，但最大因素始終係佢冇穩定工作，我睇唔到將來。以前好怕畀人話我港女，話我現實，但我真係唔係嫌佢人工低或者份工唔夠高尚，對得耐之後，我開始覺得佢冇出息。
正如佢之前講做廚師，真係有人可以闖出一片天，可以有自己餐廳，甚至成為米芝蓮，而一切一切都要時間鍛鍊同浸淫，包含咗一份堅持，而呢份堅持係佢冇，佢淨係想不斷轉工，聽朋友講兩句覺得好玩，跟住又走去轉行。
我哋分咗手都仲有聯繫，最近佢又同我講放棄咗Bartender份工，下一份想做物管。
「做物管嗰啲通常都係老粗，我讀過下書入到去好快升，總之有住戶漏水呀，有嘢要整呀，走去影下相寫份report就得，然後就call人去整，輕鬆！人工仲要唔差喎！」
唔知點解，我覺得佢呢份物管都唔會做得耐，因為佢一如以往覺得所有工作都好簡單。
雖然前途係屬於佢自己，不過分咗手之後，我的確係輕鬆咗。(完)
不問學歷 無須經驗 免費睇波 人工8000
https://youtu.be/15mCL4_TaBc