「今晚食唔食飯㗎？屋企有西蘭花喎！如果你食，一陣放工我再去買蝦。」返新工第一日，我聽到後面個女同事Grace同個男同事Mike講呢啲，第一個感覺就係佢兩個同居，又或者係兩公婆，咁我作為新人無謂咁多事啦，不過再返多一個星期工，發現個情況唔係咁簡單。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
「喂！聽朝飲茶喎！使唔叫醒你哋？」今次係隔籬部門一個阿叔，佢走嚟同我後面「疑似」係兩公婆嗰對同事Grace同Mike講。
Grace：「梗係唔使啦！我次次都起到身，係佢鬧鐘響完又再瞓之嘛！」女同事指指個男同事。
阿叔：「你兩公婆真係特別麻煩。」
Mike：「咩特別麻煩啫，最後咪又係我攞位。」
跟住又唔知邊度走咗個阿姐埋嚟搭嘴：「荃灣廣場嗰間唔掂喎，點心又唔好食，又貴，去千色店嗰間啦！」
我嘅印象就係－－－嘩！呢間公司啲同事好好感情喎！星期一至五返工仲見唔夠，第二日星期六都要約飲早茶，有冇咁多嘢傾呀！
後來我又發現，老細個司機都對呢幾位同事十分照顧，呢個司機年紀比較大，不過仲好有活力同中氣，有日臨放工前走上office同嗰幾位同事講：「今晚老細唔用車喎，車晒你哋返去啦！」
熟到個老司機（唔係識途老馬嗰種老司機，呢個司機係真老，應該全公司年紀最大）肯用老細車載佢哋返屋企，講真我都幾羨慕，相信係做咗好多年同事先會有呢份感情。
跟住嘅日子，我見佢哋都成日傾食飯傾飲茶，有時仲話去邊個邊個屋企，當然我唔係想join，只係覺得做咩唔問下我嘅？畢竟Grace同Mike都係同部門吖，然後我就同坐側邊個後生仔講：「佢哋真係好friend喎！我以前公司啲人唔會咁㗎！」
後生仔同事：「Friend？佢哋一家人嚟㗎！唔係公司話當員工係一家人嗰種，佢哋係有血緣關係，真係family！Grace係Mike嘅老婆，個阿叔係佢哋阿爸，老細個司機係阿叔個阿爸，即係Mike嘅阿爺啦！個阿姐係佢哋阿媽，你估普通同事真係會close到咁咩！」
我有啲亂：「咁癲？真係全家都喺度做喎！」
後生仔同事：「唔止，會計部Emily就係Mike嘅家姐，有個Sales叫Jason，係Mike個大佬，你應該見過㗎！好似樣㗎喎佢哋！」
我：「冇印象喎，家姐大佬都喺度做，office咁大家族，老細啲親戚？好在你提我咋，真係唔可以得罪。」
後生仔同事：「又唔使咁驚，同老細無關，司機第一個入嚟做，跟咗老細40年有多喇，然後佢再介紹個仔入嚟，即係個阿叔呀！阿叔又做咗十幾年，跟手介紹埋啲仔女同新抱。」
再繼續聽呢位後生仔同事講，Mike個阿媽反而係最後先入嚟做，目前都係做咗4年，嗰陣因為公司咁啱有Admin走，然後佢哋又介紹，所以先至會老豆老母家姐細佬，連阿爺都喺齊度。
我：「聽完你咁講都舒服啲，最初以為大家唔當我係自己人，飲茶食飯永遠唔預我，又冇叫你，仲心諗係咪有咩山頭文化小圈子。」
後生仔同事：「佢哋以前成日叫我㗎，我次次都唔去之嘛，咁明知我一定唔跟，而家咪叫我都費事囉！」
我：「叫你？你係……」
後生仔同事：「我係Mike個細佬，我同佢哋都係一家人。」
頂你個肺咩！即刻嚟張家族大合照都得啦，上影樓嘅時間都唔使book！仲有冇舅父表嫂八姨婆同表叔公呀？二家姐呢？三家姐呢？
我：「咁我諗老細真係好好，你哋全屋都幫佢做嘢，而佢又肯請晒你哋一家人，雖然好close，不過你唔會覺得做嘢唔方便咩？會唔會因為公事鬧交？又會唔會將私事帶埋去公司，有冇影響感情㗎？」
後生仔同事：「吓！我哋全家都好幸福喎！呢間公司好easy㗎咋，總之你唔走，老細就唔會炒你，如果唔係咁，阿爺都唔會做足40年啦！」
好亂呀好亂呀！我真係第一次遇見有公司幾乎請晒員工屋企人返嚟，好在之前冇亂講嘢咋，我思疑啲關係網唔止咁細，不過相信間公司同老細係有人情味嘅，數數下，班員工可以三代同堂喺齊度，真係好經典。（完）
不問學歷 無須經驗 免費睇波 人工8000
https://youtu.be/15mCL4_TaBc