「我覺得已經被世界遺棄。」
有個男會員話經過我公司附近，問有冇興趣一齊食lunch，我話ok，不過今日想食燒味。
坐低之後開始聽佢呻，都估到唔係純粹食飯㗎喇。
「最近玩交友app，真係玩唔掂。」
我：「唔怪得咁耐冇幫襯我哋公司，原來走去玩app，Skout？Tinder？」
「hmd，有冇聽過？」
我：「梗係有啦，我呢行都要睇住出面個market㗎嘛！hmd應該係匿名，唔show樣，齋文字認識先。」
「係，我估呢個app年齡層偏細，淨係啲short form已經睇死我。」
我：「咪又係嗰啲 #走甜， #走藍 咁囉，好易明呀。」
「咁咩叫 #人地？」
我：「人地？」
「有個人自介係打：醫護絲 人地 走甜。意思即係佢做醫護，已經有仔，唔講咸嘢，相反地，如果你想交友又唔想對方有另一半，就會講明 #走人地。」
我：「時代唔同喇，一切精簡呀哥哥。」
「#車巴，#紀巴，我以為係車巴你，唔係呀，係有車嘅巴打，紀巴即係做紀律部隊，好多女想要紀巴，仲有 #唔轉，意思即係唔轉app，一定要留喺hmd入面傾，估唔到玩個交友app要google咁多嘢。」
我：「呢啲好小事啦，有啲自介好誇張㗎，記得當時我見過有人咁寫：急要500，走ptgf走甜，唔好求回報，講個信字，肯借先好撳我。」
「借錢都咁有性格？我又見過啲咩24C，唔約。心諗個胸得24C咁細？原來係24歲絲打，C即係絲，而且大部分都好細個，我見到好多 #中學絲，或者標明得17、18歲。」
我：「男人唔係鍾意學生妹咩。」
「我鍾意學生妹啫，學生妹唔鍾意我呢，見過一個係咁寫：22 肥絲 長傾 聲控 搵弟弟。喂，佢都係得22，仲想搵細過佢，我呢啲30幾歲中坑好似被世界遺棄咁。」
我：「聲控係咪Siri嗰啲？」
「唔係呀，即係佢要對方靚聲呀！」
我：「其實30幾歲唔係畀世界遺棄，只係你去錯地方啫，hmd唔係你嘅right place，30幾歲嘅男女仲大把市場，快啲join返我哋speed dating啦！」
臨尾不忘兜生意，我簡直係 #盡責巴。
講咗咁耐，又係時候叫嘢食：「阿姐唔該，叉雞飯，走肥多色少飯。」
你睇，#走肥 #多色 #少飯，咪即係 #走人地 #少甜 #長傾，不過我哋上一代人通常用呢種方式叫燒味飯，呢一代就用嚟結識異性之嘛，本質一樣，唔使灰喎，去到我哋個仔嗰代，可能會再精簡啲 #甜 #地 #紀 #車 ，睇開啲啦！
—
💌大家記唔記得呢段關於交友app嘅唏噓舊文
《交友app好好傾 見面後靜蠅蠅 》
https://hkofficedaily.com/?p=15093