經歷完「煙腸」生涯之後，呢份係我第一份正式長工，後生仔見到有差唔多年紀，又靚靚女女嘅同事，窈窕淑女君子好逑係人之常情，點估到溝女會差啲冇咗份工。
見工嗰日我已經覺得reception 個女仔好靚，長頭髮斯斯文文，咁好彩又比我見成咗呢份工，做落之後，出出入入都會見到，好自然就會撩佢傾偈，我有時仲會請佢食零食，大家關係都OK 㗎，算係有講有笑，最可惜我份工有sales成份，基本上每日都要出去見客，想約佢食lunch都唔得。
見大家越嚟越熟，有次我膽粗粗約佢食晚飯，可惜佢話約咗人，都合理既，靚女喎，冇人約就奇啦，可能已經有男朋友添。
或者係之前「煙腸」間公司太垃圾，我都幾珍惜同埋enjoy喺呢間公司做，reception又有個女神呢，見到佢心情自然變好，而作為一個新人，我條數雖然唔係最top，但好過好多舊人，而且我好準時返工，同事叫我幫手永無托手踭，亦從未頂撞過阿頭，始終係新人吖嘛，加上底薪連埋佣，都幾好pay㗎，咪安安份份囉！
點知有一日阿頭煞有介事咁捉我入房，態度好認真，佢同我講，要注意下喺公司嘅言行。
我：「注意言行？我冇講過任何人壞話，又冇參與其他同事講是非喎。」
阿頭：「你係咪溝緊reception？」其實佢係指receptionist，不過我哋平時講嘢通常就咁叫reception。
我：「有時撩下佢咋，同女仔講嘢都唔得？」我當時係有少少不滿，乜呢度咁封閉咩？
阿頭：「咁你有冇約佢食飯？」
我：「約過一次，阿頭，佢係你女友？」
阿頭：「佢唔係我女友，佢係朱生女友。」
加少少註解先，朱生係我哋公司其中一個高層，絕對諗唔到佢同reception……因為靚女同我講過，佢今年25歲，同我係同年，至於朱生，50幾歲喇喎，唔係型佬type喎，樣殘，勁多白頭髮，完全符合返佢50幾歲嘅外表，佢兩個拍拖？朱生當年畢業嘅時候，靚女都仲未成為一個胚胎，唔乸係啩！
諗諗下又覺得有啲唔妥，全公司除咗我之外，其他人唔會撩reception靚女講嘢，同埋我約佢食晚飯嗰陣，附近根本冇人，如果阿頭連呢件事都知，即係靚女講啦！
阿頭補充：「朱生話，你約佢女朋友食飯，平時又成日借啲意同reception傾計，覺得你好唔檢點。」
我：「唔檢點咁嚴重？」
阿頭：「再嚴重啲都有呀，之前老細考慮過每組交一個人名，話要cut人，朱生叫我考慮cut你呀，我幾難做呀！」
我：「使唔使呀？」
阿頭：「冇啦，一來老細擱置咗，二來你真係有數返，我冇理由cut你咁戇居，即係搵自己笨，所以先捉你入房講咋，我唔係想阻你溝女，但呢條女你溝唔到㗎喇，冇咗份工唔抵吖嘛。」
啱嘅，新人嚟講，我呢份糧真係好好，唔值得為條女搞到乜都冇，細心諗下，佢同我同年，咁都肯受朱生溝，唔好美化係陳凱琳同鄭嘉穎嗰種20幾年差距喎，要搞清楚朱生唔係鄭嘉穎咁嘅樣，而係一個白髮大肚腩猥瑣阿叔中坑樣，算啦，呢條女都係溝唔過。
最後我同阿頭講，之後唔會再撩reception講嘢，另外問咗句：「其他同事知唔知佢同朱生嘅關係？」
阿頭：「個個都知，係你新入嚟做冇幾耐所以唔知。」
仆街吖！原來咁多人唔出聲喺度食花生睇戲，職場真係好難有知心友，阿頭都係見我條數幾好，先至唔想我因為呢件事而畀人雞，同埋呢啲地下情真係好煩膠，仲要玩埋忘年戀，我搵食都係行遠啲，怕Q咗佢哋。
投稿讀者：我差啲死
＝＝＝
🥸 大叔溝女都唔一定百發百中㗎！
《有個大叔追我同事 》情侶座
https://hkofficedaily.com/?p=10527