唔好意思我想投訴你行家，我知獵頭嘅職責就係撬人過檔，但都唔好喺人哋聽緊call，做緊嘢嘅時候獵佢吖，好似走入人哋舖頭搶嘢咁。
我喺某電訊公司做CS supervisor，其中一個職責係random咁樣mon同事啲call，上個月咁啱mon到你啲獵頭行家撬我同事，你個行家本身係打上嚟hotline問嘢，另外要轉plan，臨尾佢讚我個同事有禮貌，講解清晰，又有耐性，有讚賞當然係好事啦，但佢竟然問我同事想唔想轉工？
我mon call mon到打咗個突，你行家叫我同事講私人電話號碼佢知，我同事話唔方便，不過多謝佢，最後問仲有冇其他嘢幫到手？
講到咁樣，你個行家都未放棄，佢話明白hotline有錄音，可能唔方便留私人電話號碼，跟住就叫我同事抄低佢手提，希望放咗工之後電聯，話會等我同事電話。我同事係男，你行家係男，所以真係撬人，唔係溝女。
收咗線之後，我行埋去同事個位同佢講，叫佢唔好立亂打返畀個客，一陣人哋玩你，再投訴你私下call就大鑊，同事雖然答我唔會咁做，但係第二日就請假，有冇咁啱呀？再過多幾日，我同事就辭職唔做，佢話自己搵到份新工，我問係咪上次個獵頭撬你？佢死都話唔係，我唔信咁巧合囉！
其實我當時有mark低你行家電話，不過諗諗下算啦，可能佢真係介紹咗份好工畀我同事，無謂阻人發達，唔通我又私下打畀你個行家，即係我公司啲客咩，不過你哋獵頭唔好咁樣撬人吖嘛，會唔會太明目張膽呀？
同埋我想講，其實我哋電訊公司CS hotline呢邊有好多同事係由獵頭公司請返嚟，即係我哋呢頭畀錢你哋請人，你哋收完佣金又走返嚟撬走我哋啲人，咁樣好冇道義啫！
想請問一句，其實你哋獵頭公司有冇內部指引，例如唔可以經hotline撬走我哋員工，你行家咁樣做算唔算係違規呢？
投稿讀者：我係投訴唔係投稿