年頭有套日劇叫做《星降る夜に》，題材算幾特別，講述主角北村匠海飾演一位遺物整理師，佢會去已故客戶嘅屋企執屋，然後將遺物交返畀死者嘅家人，有集講主角喺執拾遺物嗰陣檢獲一隻AV，呢個情況其實細佬有同我討論過……
「大佬，如果第日我死先，記得幫消滅晒啲AV！」以為細佬咁好人益我，原來佢係怕啲AV畀老婆發現，希望我幫佢毀屍滅跡，保持返一個好好先生嘅形象喎……傻豬嚟嘅，日本有書店專門處理呢個問題，每年嘅銷售額仲超過30億日圓，大茶飯嚟㗎！
日本利根書店推出咗個「男の終活」服務，主要係幫人善後，處理死者嘅珍藏，聽落都幾貼心吖，而其實呢間書店嘅主要業務係買賣二手鹹碟，大部份貨品都係333yen，即係HKD 18有交易，咁平有得尋寶又唔錯，你知有好多碟都絕咗版㗎嘛！
雖然利根書店嘅店舖主要分布於埼玉縣、長野縣、群馬縣等等，但報道指佢哋每年嘅銷售額超過30億日圓，兌返港元都成1.6億，絕對係非常可觀嘅數字。
唔好下下講錢咁市儈，我哋講返個「男の終活」服務先，據書店公關亀井彬先生透露，佢哋之所以會發展呢項業務，源於有次收到個女士嘅電話，對方話：「我爸爸過咗身，但執拾遺物時發現大量鹹碟，唔識得點處理，好困擾。」
喺度要解釋下先，喺香港丟垃圾可能係一件好方便嘅事，不過喺日本就唔係咁簡單，呢度丟垃圾要跟日子，而且你丟出去之後，唔排除會有啲紀律嚴明嘅鄰居或者類似管理員嘅人，喺清晨時份翻你嘅垃圾，檢查你有冇做好分類，如果你曾經喺日本生活過，相信對呢種情況唔會感到階陌生。
嗰位女士向亀井彬先生講，當時除咗覺得咁樣丟鹹碟好難為情之外，佢先父嘅鹹碟數目更可以用「海量」去形容，其實莫講話嗰位女士啦，我作為男士如果要丟棄大量鹹碟都應該搞唔掂。
亀井彬先生接受訪問時提到，書店後來再收到唔少女士嘅電話查詢，遇到嘅問題都差唔多，於是乎就靈機一觸，大力宣傳「男の終活」服務，結果又好受歡迎，就係咁，利根書店就殺出一條財路喇！
可能你會質疑：「會唔會有咁多女士煩惱清理鹹碟問題呀？吹水咩！」
唔排除呢個係利根書店嘅宣傳手法，因為ebay當年都話過網站成立初期係為咗畀一眾糖果盒收藏家交換心頭好，後期ebay又改口話呢個故事只係公關橋段，不過我又覺得利根書店嘅講法未必完全虛構，畢竟而家呢個世代雖然人人都download AV，但講到先父呢啲上一代，可能真係下下要買實體碟㗎嘛！日本又嚴禁老翻，你好難搵到好似好景嗰啲「四樓有四級」舖頭。
Anyway啦，自從利根書店呢項服務開始之後，亀井彬先生話多咗60歲以上嘅男士落嚟賣鹹碟，係賣走，唔係買，上咗年紀嘅人似乎開始為身後事做準備，正常嘅，邊個想死後先畀屋企人發現有一大堆AV珍藏吖！
最好笑係亀井彬先生話，而家每個月嘅網上查詢數量錄得穩步上揚嘅增長，查詢信件內容永遠係以呢幾句做開場白：「已故嘅兄弟乜乜乜乜」，或者係「過咗身嘅親戚物物物物」
明白，情況即係等如我哋成日都講：「我有個朋友呢……」
「我幫個朋友問咋！」
「喂，唔係我，有個friend呢…….有堆鹹碟……想賣……」
總而言之，利根書店嘅呢壇回收鹹碟嘅生意就run得好順，年收過億，咁佢哋真係要多謝最初打嚟話要處理先父鹹碟嗰位女士喇！
即使係賣鹹碟，你都唔需要覺得成件事好猥瑣，因為利根書店已經幫你包裝好，唔係包裝隻鹹碟，係包裝你個形象，因為亀井彬先生話：「鹹碟係有佢嘅價值，記住唔好亂掉，交畀利根書店處理，最最最重要係支持環保，為地球出一分力！」
果然係公關，不過幫佢哋買二手鹹碟嘅人，返到屋企之後又會唔會用多咗紙巾，繼而又產生出更多垃圾呢……