較早前睇咗《金都》，一套講愛情嘅電影，但我諗起阿爸。
唔知你哋會唔會睇，所以重要嘅嘢唔劇透。鄧麗欣飾演嘅角色一度抗拒結婚，其中一個原因係以前窮嗰陣，曾經藉住假結婚去搵快錢，本身懶懶閒冇再去跟進，點知當年冇同嗰位大陸男搞埋離婚，所以到真係要結婚嘅時候就企咗喺度。
我阿爸同阿媽離婚之後，曾經同一個大陸女假結婚。我阿爸唔知點解長期等錢用，我哋兩兄弟完全受晒，當時連唯一一部手提電話都要賣埋出去幫佢。印象最深刻有兩次，某日有個男人上嚟我屋企搵阿爸，原來係佢公司同事，阿爸借咗一個月糧之後失蹤冇再返工，當時我又好細個，不斷代佢向同事say sorry，對方仲要好好咁話：「算啦唔緊要，都係擔心佢係咪出咗事。」
隔咗幾日，又有個聽聲都知道江湖味好重嘅人打嚟：「喂，想搵XXX（我阿爸個名），我哋係衛生署。」細細個嘅我唔知邊度嚟嘅勇氣，直接同對方講：「你肯定唔係衛生署啦！係咪追數呀？」
嗰把江湖味好重嘅聲音堅持：「唔係唔係，我真係衛生署。」
我：「咁衛生署打嚟搵佢做咩？」
「喔……」
我：「我係佢個仔，雖然幫唔到佢還錢，但你講畀我聽啦，見到即刻提佢。」
「其實你阿爸唔係欠我錢，佢之前幫我哋公司搞假結婚，收咗幾皮嘢㗎喇，而家要同個女人返鄉下搞埋啲手續，否則就有結婚冇離婚，我哋搵咗你阿爸好耐喇，你同佢講聲吖，個女人肯額外再加錢，你阿爸仲有幾萬蚊收㗎！」
Exactly係《金都》嘅情節。
而另一幕就係鄧麗欣要結婚擺酒，打去問佢老竇會唔會嚟飲？個老竇答：「嚟到就嚟啦」然後cut線，同我當年差啲結婚，打長途電話去印尼話買埋機票請佢返嚟飲，佢答：「唔返」嘅情景一模一樣。
好多親戚朋友都叫我哋兩兄弟放棄呢個阿爸，不過我哋做唔出，曾經想飛過去泗水探望，可惜佢連地址都唔肯畀我哋，從印尼嘅物價指數同埋佢每個月問我哋拎錢嘅金額，幾乎可以肯定我老豆喺當地已經有另一頭家。
人人都估我媽咪聽到老豆問要錢嘅時候，會叫我哋兩兄弟唔好畀，其實正正係相反，遇到貪得無厭嘅情況，有時我會好躁，有時就係我細佬好躁，而媽咪就會講：「算啦，你哋幫到就幫佢啦！」
～～～我原諒他，這樣我才能活下去～～～
來自作家林奕含嘅句子，我相信媽咪選擇原諒，係因為咁樣先可以釋懷，咁樣先可以放過自己。
或者我老豆唔係一個稱職嘅父親，不過反面教材都係教材，我一直提醒自己前車可鑑，所以真心想同佢講一聲：「父親節快樂！希望你健健康康，唔好再不斷辜負真心對你好嘅人。可能你已經再成為別人嘅父親，其實係窮爸爸定係富爸爸並非最重要，最重要係做一個負責任嘅爸爸，唔好再畀其他小朋友經歷我同細佬嘅童年。」