因為失業咗接近一年，早排我做咗件好衰仔嘅事，就係打返去搵以前個Manager R撈，一來已經走投無路，二來搵Manager嗰下都係隨口提一提：「喂，公司有冇位呀？幫手留意下吖，唔該晒🙏🏻」同一個msg我仲send咗畀幾個朋友同舊客。
意想不到嘅係，相隔幾日之後竟然收到Manager回覆：「你上次係咪講堅呀？Simon嗰邊差個人喎，你真係啱嘅，我就叫佢唔好出招聘廣告，點吖？」其實我離開咗呢間公司3年，之後份新工唔爭氣，做咗兩年就大裁員，我年紀又唔細，搵咗好耐都搵唔到工。
其實舊公司請返我嘅過程都叫順利，因為基本上唔使interview，淨係上去同嗰個Simon見下傾下，文件同reference letter都唔需要，不過佢向我提出咗幾個條件。
Simon：「因為再請你返嚟做，老細一定會問長問短，你可唔可以應承一年內唔走吖？嗱！員工合約就冇呢項條款嘅，你真係要辭職都會跟返勞工法例，係我想你最少做一年啫，如果你做一陣又走，我會好難交代。」
我：「得，冇問題！」就嚟坐石山崩冇飯開喇，加上嗰陣搵工真係好難，我驚你一年內炒我就真啦！
Simon呢關唔難過，佢都好開心唔使出招聘廣告請人見人，最難捱反而係同事之間嘅咀臉。
其實我上嚟公司見Simon嗰日，已經有好多人望住我竊竊私語，主動同佢哋打招呼，啲人嘅表情又怪怪咁，但真正嘅問題喺我正式返工先至開始。
「咦！返咗嚟做呀？出面撈唔掂咩？」
你梗係以為我舊陣時得罪人多，其實我同呢個同事並唔熟，工作上冇交接，更加唔會有過節，我當年同而家一樣，比較獨家村，食晏都係自己食多。
又試過有人咁樣同我講：「好馬不吃回頭草喎！佢哋叫你返嚟定係點㗎？」
我：「唔係，我自己問阿頭仲請唔請人。」事無不可對人言，何況真係我主動R撈。
「做咩呀？畀人炒呀？」
我：「上一間公司大裁員。」
「大裁員？咁即係冇裁晒啦，又會淨係裁你嘅？」
我：「可能佢哋覺得我做嘢唔掂啦！」你都係咁諗啫！
當然仲唔少得啲Old Seafood畀說話我聽啦：「返嚟做就畀心機嗱，公司好大方㗎喇，走咗都仲收容你。」
我：「係嘅，知道，我會畀心機。」
Old Seafood：「我話畀你聽，老細對啲叛將嘅睇法係唔同啲，你走過已經代表養唔熟，老細未必會信你，所以再返嚟做真係要醒醒定定，機會得一次。」
嗰種教訓嘅口吻真係好難頂，不過我忍，因為我好需要呢份工，應該係咁講，我真係好需要一份穩定嘅收入。
公司又唔係全部人都咁樣嘅，但真係聽過好多人當住我面講咩「回頭草」，我盡量只會記啲好人好事，例如之前個Manager幫我鋪橋搭路返嚟，又例如Simon咁易話為就請咗我，其他人嘅說話咪當嘈音囉，咁樣做人會比較易過啲。
老婆問我返去舊公做成點，我會話：「好好呀，直頭唔使適應。」
「啲同事會唔會覺得好怪呀？」
我：「冇呀，即係好似周星馳套喜劇之王咁之嘛，個神父死極都死唔去，又見到我。」然後我同老婆就會一齊笑。
我老婆3年前患咗脊柱炎，最嚴重嘅時候要坐輪椅，其實而家都未好返晒，當年我就係因為呢個原因而轉工，因為新工搵得比較多，工作地點亦比較近屋企，我想方便啲照顧我老婆，但係人算不如天算，點估到一個疫情影響咁大，新工冇咗，年紀又大咗，失業嗰一年雖然有返其他散工，但收入好唔穩定，無計可施之下，我先至周圍問人有冇工介紹。
相比起老婆要坐輪椅，每晚都痛到瞓唔著，又要一直接受各類治療，我聽下嗰啲單單打打嘅說話又算得咩？唔通我又周圍同同事講成件事嘅因由，搏佢哋體諒而收聲咩？你咪寸我囉！男人老狗呢啲嘢仲頂得住，所以我對住老婆都係報喜不報憂，生存要緊，其他嘢並唔重要。